मुंबई - गुजरातच्या तापी जिल्ह्यातील सोनगढच्या मांडल टोल नाक्यावर आज सकाळी भीषण दुर्घटना झाली. लग्नाचं वऱ्हाड घेऊन निघालेली बस थेट टोलनाक्यावर येऊन धडकली. या अपघातात टोलनाक्यावरील 3 कर्मचाऱ्यांसह एकूण 15 जण जखमी झाले आहेत. त्यामध्ये, 4 जणांची प्रकृती गंभीर आहे. जखमींना जवळीलच वेगवेगळ्या रुग्णालयात भरती करण्यात आलंय. टोल नाक्यावरील सीसीटीव्ही कॅमेऱ्यात ही घटना कैद झाली आहे.
सोनगढच्या मांडल टोल नाक्यावरील अपघाता व्हिडिओ समोर आला असून तो सोशल मीडियावर व्हायरल होत आहे. महाराष्ट्रातून सूरतकडे जाणाऱ्या या बसला टोलनाक्यावर अपघात झाला. चालकाचे बसवरील नियंत्रण सुटल्याने ही भीषण दुर्घटना घडली. या बसमध्ये एकूण 40 जण प्रवास करत होते. लग्नाचे वऱ्हाड घेऊन ते सुरतला जात होते. त्यावेळी, बसने थेट टोलनाक्यावरच धडक दिली. त्यामध्ये, टोलनाक्याच्या केबिनमधील महिला कर्मचाऱ्यासह आणखी दोघांना गभीर दुखापत झाली आहे.