अपघाताच्या बहाण्याने लुटमार

म�

��रहाण : सोनसाखळी, मोबाईल लंपास : जरीपटक्यातील घटना
नागपूर : अपघाताच्या बहाण्याने वाद घालून लुटारूंनी अपघातग्रस्त कारमधील तरुणांना मारहाण केली आणि त्यांच्या गळ्यातील सोनसाखळी तसेच मोबाईल हिसकावून नेला. जरीपटका पोलीस ठाण्याच्या हद्दीत गुरुवारी मध्यरात्री ही घटना घडली.
निखील ओमप्रकाश मालपाणी (वय २३, रा. वर्धमान नगर) आणि त्याचा मित्र चेतन भिकुलाल मालू (वय २६, रा. शांतीनगर) हे दोघे गुरुवारी रात्री डनलप ढाबा येथे जेवायला गेले होते. रात्री १२ च्या सुमारास परत येताना त्यांची भरधाव स्विफ्ट कार (एमएच ४९/ यू ०७१२) अनियंत्रित झाल्यामुळे कामठी मार्गावरील पीडब्ल्यूएस कॉलेजसमोरच्या डिव्हायडरवर धडकली. वेग जास्त असल्यामुळे डिव्हायडरवर कार उलटी झाली. जोरदार आवाज झाल्यामुळे आजूबाजूची मंडळी धावली आणि कारमधून निखील तसेच चेतनला बाहेर काढले. या दोघांना कोणतीही दुखापत झाली नव्हती. दरम्यान, तेथे चार आरोपी आले. त्यांनी निखील तसेच चेतनशी वाद घातला. तुमच्यामुळे आमच्या मित्राला अपघात झाला. त्याला हॉस्पिटलमध्ये भरती करण्यात आले असून ५० हजार रुपये खर्च आहे, असे म्हणत पैशाची मागणी करू लागले. निखीलने पोलिसांना फोन केला, त्यांना येऊ द्या, असे म्हटले असता आरोपींनी या दोघांना मारहाण करीत त्यांच्या गळ्यातील सोनसाखळी तसेच मोबाईल असा एकूण १ लाख, ३० हजारांचा ऐवज हिसकावून नेला. निखीलने दिलेल्या तक्रारीवरून जरीपटका पोलिसांनी जबरी चोरीचा गुन्हा दाखल केला. आरोपींचा शोध घेतला जात आहे.
----