नवी दिल्ली - उत्तर प्रदेशच्या कुशीनगरमध्ये एक हृदयद्रावक घटना समोर आली आहे. रुग्णवाहिका मिळाली नाही म्हणून एका आईवर मुलाचा मृतदेह खांद्यावरून नेण्याची वेळ आली आहे. मिळालेल्या माहितीनुसार, रुग्णालयाबाहेर असलेल्या एका हतबल आईला मुलाचा मृतदेह घरी नेण्यासाठी रुग्णवाहिका मिळाली नाही. या घटनेचा एक व्हिडीओ सध्या सोशल मीडियावर जोरदार व्हायरल होत आहे. या घटनेने सर्वांनाच धक्का बसला आहे.
कुशीनगरच्या तमकुहीराज येथे ही धक्कादायक घटना घडली आहे. तमकुहीराजमध्ये राहणाऱ्या वहाब अन्सारी यांचा पाच वर्षांचा मुलगा हा खेळता खेळता विजेच्या तारेच्या संपर्कात आला आणि त्याला करंट लागला. घरात असलेल्या आईने त्याला तातडीने उपचारासाठी एका सरकारी रुग्णालयात नेलं. पण तेथे उपस्थित असलेल्या डॉक्टरांनी मुलाला मृत घोषित केलं आहे.
मुलाचा मृत्यू झाल्यानंतर रुग्णालयातील कर्मचाऱ्यांनी आईला त्याचा मृतदेह घरी घेऊन जायला सांगितलं. तेव्हा त्याला उचलून घेत ती रुग्णालयातून बाहेर पडली. मृतदेह घेऊन जाण्यासाठी तिला रुग्णवाहिका मिळाली नाही. त्यानंतर थोड्यावेळाने महिला एका बाईकवरून मृतदेह घेऊन गेली. वेळेत रुग्णवाहिका न मिळाल्याच्या अनेक घटना याआधी समोर आल्या आहेत. एका हिंदी वेबसाईटने याबाबतचे वृत्त दिले आहे.