बंगळुरू : कर्नाटक औषध नियंत्रण विभागाने (KDCD) नुकतेच एक परिपत्रक जारी करून १८ वर्षांखालील महिलांना गर्भनिरोधक (Contraceptive) आणि कंडोमच्या (Condoms) विक्रीवरील वादग्रस्त बंदी मागे घेतली आहे. बंदीमुळे नको असलेली गर्भधारणा आणि लैंगिक संक्रमित रोग (STDs) याबाबत उद्भवणाऱ्या जोखमीबद्दल नवीन वादविवाद सुरू झाले. यानंतर कर्नाटक औषध नियंत्रण विभागाने आता फार्मासिस्टना कंडोम आणि गर्भनिरोधक औषधे अल्पवयीन मुलांना विकण्यासाठी बंदी घालण्याबाबतचं कोणतंही परिपत्रक जारी करण्यास नकार दिला आहे.
दरम्यान, राज्य सरकार लैंगिक संक्रमित रोग टाळण्यासाठी आणि लोकसंख्या नियंत्रणासाठी कंडोमचा प्रचार करत आहे. परंतु, ते किशोरवयीन मुलांसाठी किंवा शाळकरी मुलांसाठी नाही, असे राज्याचे प्रभारी औषध नियंत्रक भागोजी टी खानपुरे यांच्या हवाल्याने अनेक मीडिया रिपोर्ट्समध्ये म्हटले आहे. बंगळुरू मिररच्या वृत्तानुसार, खानापुरे यांनी स्पष्टपणे सांगितले होते की 'अल्पवयीन किशोरवयीन मुलांना गर्भनिरोधक विकू नयेत, असे परिपत्रक कठोरपणे जारी करण्यात आले होते'. नंतर खानपुरे स्वतःच म्हणाले की 'आम्ही अशा आशयाचे कोणतेही परिपत्रक काढले नाही. मीडियामध्ये हे चुकीच्या पद्धतीने दाखवण्यात आले'.
गेल्या वर्षी नोव्हेंबरमध्ये शालेय विद्यार्थ्यांच्या बॅगमध्ये कंडोम, गर्भनिरोधक, सिगारेट आणि व्हाईटनर सापडल्यानंतर हे परिपत्रक जारी करण्यात आले होते. गेल्या वर्षी नोव्हेंबरमध्ये विद्यार्थ्यांना वर्गात मोबाइल फोन घेऊन जाण्यापासून रोखण्यासाठी अचानक तपासणी केली गेली होती. मात्र यानंतर शाळेतील अधिकाऱ्यांना धक्का बसला. बॅगमध्ये सेल फोन व्यतिरिक्त, अधिकार्‍यांना कंडोम, गर्भनिरोधक, लायटर, सिगारेट आणि व्हाईटनर, असे साहित्य इयत्ता 8, 9 आणि 10 वीच्या विद्यार्थ्यांच्या बॅगमधून सापडले होते.
वादग्रस्त आदेश जारी झाल्यानंतर लगेच त्यावर तज्ज्ञ आणि फार्मासिस्ट यांनी टीका केली. यामुळे नको असलेली गर्भधारणा आणि लैंगिक संक्रमित संसर्ग (STIs) यामध्ये वाढ होईल, असे तज्ज्ञ आणि फार्मासिस्ट यांनी म्हटले. तसेच, काहींनी असेही सांगितले की, बंदी प्रभावीपणे लागू केली जाऊ शकत नाही, कारण कंडोम आणि गर्भनिरोधक केवळ फार्मसीच नव्हे तर सर्व स्टोअरमध्ये उपलब्ध आहेत. साध्या कपड्यात येणाऱ्या ग्राहकांमध्ये फरक करणं त्यांच्यासाठी अवघड असल्याचेही काही फार्मासिस्टनी म्हटले.