कामठी... अधिवेशन

ग�

��रामीण विकासासाठी पत्रकारांचे मोलाचे योगदान
कृपाल तुमाने : कामठी येथे जिल्हा मराठी पत्रकार संघाचे अधिवेशन
कामठी : ग्रामीण भागातील विकासासाठी पत्रकाराचे मोलाचे योगदान असते. ग्रामीण पत्रकार हे खेड्यापाड्यातील समस्या व अन्यायांना प्रामाणिकपणे वाचा फोडतात, असे मत खा. कृपाल तुमाने यांनी व्यक्त केले. नागपूर जिल्हा मराठी पत्रकार संघाच्यावतीने स्थानिक दिवाण मंदिरात आयोजित द्विवार्षिक अधिवेशनाच्या उद्घाटनप्रसंगी ते बोलत होते.
नागपूर जिल्हा मराठी पत्रकार संघातर्फे कामठी येथे रविवारी द्विवार्षिक अधिवेशन पार पडले. कार्यक्रमाचे उद्घाटन रामटेकचे खा. कृपाल तुमाने यांच्या हस्ते करण्यात आले. याप्रसंगी पाहुण्यांच्या हस्ते दीप प्रज्वलन व बाळशास्त्री जांभेकर यांच्या प्रतिमेला माल्यार्पण करण्यात आले. यावेळी काटोलचे आ. डॉ. आशिष देशमुख, स्वागताध्यक्ष तथा कामठी पालिकेचे उपाध्यक्ष रणजित सफेलकर, नगरसेविका मीना सफेलकर, जिल्हा माहिती अधिकारी अनिल ठाकरे, ॲड. अनिल महात्मे, पत्रकार संघाचे जिल्हा अध्यक्ष कृष्णकुमार मिश्रा, कार्याध्यक्ष दिलीप हिवरकर, रमेश बावीस्कर आदी उपस्थित होते.
कार्यक्रमाच्या उद्घाटनप्रसंगी खा. कृपाल तुमाने, आ. डॉ. आशिष जयस्वाल यांनी मार्गदर्शन केले. खा. तुमाने म्हणाले, ग्रामीण भागातील पत्रकारांना विविध समस्यांना तोंड देऊन पत्रकारिता करावी लागते. ग्रामीण पत्रकार केंद्र व राज्य शासनाच्या विविध योजना सर्वसामान्य नागरिकांपर्यंत पोहोचवितात. ग्रामीण पत्रकारांच्या समस्या आपण प्राथमिकतेने सोडविण्यासाठी सहकार्य करणार असल्याचेही त्यांनी सांगितले. यावेळी सर्व पाहुण्यांचा न.प. उपाध्यक्ष रणजित सफेलकर यांच्या हस्ते सत्कार करण्यात आला.
कार्यक्रमाचे प्रास्ताविक दिलीप हिवरकर यांनी केले. संचालन प्रदीप घुमडवार यांनी तर आभार सुदाम राखडे यांनी मानले. याप्रसंगी सन २०१४-१६ दरम्यान द्विवार्षिक जिल्हा पत्रकार संघाच्या निवडणुकीत अध्यक्ष म्हणून दिलीप हिवरकर, कार्याध्यक्षपदी प्रदीप घुमडवार तर सरचिटणीसपदी योगेश कोरडे विजयी झाल्याचे निवडणूक निर्णय अधिकारी ॲड. अनिल महात्मे यांनी जाहीर केले. नवनिर्वाचित पदाधिकाऱ्यांचे पत्रकार संदीप कामळे, उज्ज्वल रायबोले, नितीन रावेकर, सुनील चलपे, श्यामलाल शर्मा, वाजीद अली, गजानन बोरकर, नंदू कोल्हे, राजेश शर्मा, दुबे आदींनी स्वागत केले. अधिवेशनाला जिल्ह्यातील पत्रकार मोठ्या संख्येने उपस्थित होते. (तालुका प्रतिनिधी)