श्रीनगर - जम्मू-काश्मीरच्या अनंतनागमध्ये गुरुवारी (31 जानेवारी) पोलीस स्टेशनवर दहशतवाद्यांनी ग्रेनेड हल्ला केल्याची माहिती समोर आली आहे. या ग्रेनेड हल्ल्यात दोन सीआरपीएफ जवानांसह पाच जण जखमी झाले आहेत. जखमींना उपचारासाठी जवळच्या रुग्णालयात दाखल करण्यात आले आहे. हल्ल्यानंतर जवानांनी परिसराला घेराव घालत हल्लेखोरांचा शोध घेण्यास सुरुवात केली आहे.
कुलगाम जिल्ह्यात बुधवारी (30 जानेवारी) एका पोलीस चौकीवर दहशतवाद्यांनी ग्रेनेड हल्ला केला होता. या हल्ल्यात तीन नागरिक जखमी झाले होते. दहशतवाद्यांनी कुलगाम जिल्ह्यामधील दमहाल हांजीपुरातील एका पोलीस चौकीवर ग्रेनेड हल्ला केला होता. दहशतवाद्यांनी फेकलेला ग्रेनेड रस्त्याशेजारी पडला आणि यात तीन नागरिक जखमी झाले.