जम्मू काश्मीरमध्ये मोठी दुर्घटना घडली आहे. आयटीबीपी जवानांना घेऊन जात असलेली जम्मू काश्मीर पोलिसांची बस खोल दरीत कोसळली आहे. यामध्ये अनेक जवान गंभीर जखमी झाल्याची प्राथमिक माहिती येत आहे. तर सहा जणांचा मृत्यू झाल्याचे समजते आहे. बसचे ब्रेक फेल झाल्याने ही बस २०० फूट खोल दरीत कोसळली.
चंदनवारीहून पहलगाम येथे हे जवान जात होते. या बसमध्ये ३७ आयटीबीपीचे जवान आणि दोन जम्मू काश्मीर पोलिसांचे जवान प्रवास करत होते. अमरनाथ यात्रा परिसरात या जवानांची तैनाती करण्यात आली होती.
आयटीबीपीच्या सहा जवानांना आपला जीव गमवावा लागला आहे, तर इतर अनेक जवान जखमी झाले आहेत, त्यांना उपचारासाठी श्रीनगर येथील लष्करी रुग्णालयात हलवण्यात येत आहे, असे पोलिसांनी सांगितले.