इस्रायलनेइराणवर केलेल्या हल्ल्याची सध्या संपूर्ण जगभरात चर्चा सुरू आहे. इस्रायलनेइराणवर तुफान हल्ले केले आहे. यासंदर्भात आता शिया धर्मगुरु मौलाना यासूब अब्बास यांची प्रतिक्रिया आली आहे. त्यांनी इस्रायलच्या या हल्ल्याचा निषेध केला आहे. तसेच, इस्लामला बदनाम करण्यासाठी बार क्लब आणि जुगाराचे अड्डे सुरू करणे सोपे आहे. मात्र, इस्लामचे संरक्षण करणे कठीण आहे. जे केवळ इराण करत आहे. यावेळी, अमेरिका आणि इस्रायल मानवतेचे शत्रू आहेत, असेही ते म्हणाले.
मौलाना यासूब म्हणाले, "मी इस्रायलने इराणवर केलेल्या हल्ल्याचा निषेध करतो. इस्रायलने इराणवर केलेल्या हल्ल्यामागे पूर्णपणे अमेरिकेचा हात आहे. कारण इस्रायल आणि अमेरिका दोघेही नेहमीच इराण आणि मानवतेचे शत्रू राहिले आहेत. मी त्या इस्लामिक नेत्यांचाही निषेध करतो, जे मानवतेच्या या युद्धात इराणला पाठिंबा देण्याऐवजी अमेरिका आणि इस्रायलला पाठिंबा देत आहेत."
मौलाना यासूब पुढे म्हणाले, "मी त्यांना सांगू इच्छितो की इस्लामला बदनाम करण्यासाठी बार, क्लब आणि जुगारचे अड्डे सुरू करणे फार सोपे आहे. मात्र, इस्लामचे रक्षण करणे अत्यंत कठीण आहे. जे आज इराण एकाकी करत आहे."
इस्रायल-इराण तणाव वाढला - ऑपरेशन रायझिंग लायन अंतर्गत इस्राइलने इराणमध्ये हवाई हल्ले करत अणुकेंद्र, लष्करी तळ, अणुशास्त्रज्ञ आणि बड्या लष्करी अधिकाऱ्यांना लक्ष्य केल्यानंतर, इराणनेही ऑपरेशन प्रॉमिस सुरू करून इस्राइलवर जोरदार प्रतिहल्ला केला असून, इस्राइलच्या जवळपास प्रत्येक भागाला शेकडो क्षेपणास्त्रे आणि ड्रोनच्या माध्यमातून लक्ष्य करण्यात आले आहे. त्यामुळे इस्राइलमध्ये आणीबाणीची परिस्थिती निर्माण झाली असून, नागरिकांना तातडीने तळघरांमध्ये आश्रय घेण्याचे आदेश देण्यात आले आहेत. दरम्यान, इस्राइलच्या संरक्षण यंत्रणांनी इराणकडून करण्यात आलेल्या क्षेपणास्त्र हल्ल्यातील बहुतांश क्षेपणास्त्रं रोखण्यात आल्याचा दावा केला आहे. मात्र या हल्ल्यात काही इस्राइली नागरिक जखमी झाल्याचं वृत्त आहे. दरम्यान, या हल्ल्यात 78 जणांचा मृत्यू झाला असून 329 जण जखमी झाल्या आहेत, असे इराणने म्हटले आहे. तर इस्रायलने 20 जण मारले गेल्याची पुष्टी केली आहे.