दहशतवादी संघटनांशी संबंध असल्याच्या आरोपावरून चीनमध्ये भारतीयाला अटक

बिजिंग, दि. १५ - दहशतवादी संघटनांशी संबंध असल्याच्या आरोपावरून चीनमध्ये एका भारतीयासह काहीजणांना अटक करण्यात आली आहे. उत्तर चीनमध्ये एकूण २० जणांना अटक करण्यात आली होती, मात्र त्यातील ११ जणांची कोणताही गुन्हा दाखल न करता सुटका करण्यात आली. पण इतर नऊ जणांना मात्र अद्यापही ताब्यात ठेवण्यात आले असून त्यात एका भारतीयासह दक्षिण आफ्रिकेतील ५ जण व ब्रिटनमधील तिघांचा समावेश आहे. 

चीनमधील अधिका-यांनी दिलेल्या माहितीनुसार अटक करण्यात आलेले हे सर्व पर्यटक ४७ दिवसांसाठी चीनमध्ये आले असता इनर मंगोलियातील इरदोस शहरात त्यांना अटक करण्यात आली. अटक करण्यात आलेल्यांपैकी काहीजण हॉटेलच्या रुममध्ये बसून बंदी असलेल्या दहशतवादी संघटनांचे व्हिडीओ पहात होते. अटकेतील ११ जणांची सुटका करण्यास चीनने संमती दिली असली तरी ९ जणांना अद्यापही ताब्यात ठेवण्यात येणार आहे. दरम्यान याप्रकरणी आपल्याला काहीही माहिती मिळाली नसल्याचे भारतीय दूतावासातील अधिका-याने सांगितले असून दक्षिण आफ्रिकेच्या दूतावासातील अधिका-यांनी कोणतीही प्रतिक्रिया दिलेली नाही.