स्वातंत्र्य दिनाच्या पूर्वसंध्येला एक धक्कादायक व्हिडिओ समोर आला आहे. एक पोलीस कर्मचारी चेक पोस्टवर वाहन चालकांची चौकशी करत असताना एका कार चालकानं तपासासाठी नकार देत थेट पोलीस कर्मचाऱ्यावर गाडी चढवल्याचा भयानक प्रकार घडला आहे. यात पोलीस कर्मचारी जबर जखमी झाला असून त्याच्यावर रुग्णालयात उपचार सुरू आहेत.
पंजाबच्या पटियाला शहरात ही घटना घडली आहे. पटियालामध्ये वाहनांच्या चौकशी दरम्यान एका कार चालकानं पोलीस कर्मचाऱ्यावरच कार चढवली आणि घटनास्थळावरुन पळ काढला. पोलिसांनी संबंधित कार चालकाचा शोध लावला असून प्रकरणाची चौकशी सुरू असल्याचं पोलिसांनी सांगितलं आहे.
कार चालकाची चौकशी करण्यासाठी कार थांबविण्याचा पोलीस कर्मचारी प्रयत्न करत असताना चालकानं कार थांबविण्यास नकार दिल्याचं व्हिडिओमध्ये दिसत आहे. यात कार चालकानं पोलीस कर्मचाऱ्याला अक्षरश: उडवलं आहे आणि काही मीटर अंतरावर त्याला फरफटत नेण्याचा प्रकार घडला आहे. काही अंतरावर गेल्यानंतर पोलीस कर्मचारी गंभीर जखमी अवस्थेत रस्त्यावर पडला. आरोपी कार चालकानं कोणतीही माणूसकी न दाखवता घटनास्थळावरुन पोबारा केल्याचं व्हिडिओत दिसून येतं.