राजस्थानमधील झुंझुनू जिल्ह्यातील नवलगड येथे विम्याची रक्कम मिळवण्यासाठी पतीने मित्रांसोबत मिळून पत्नीची क्रूरपणे हत्या केल्याच्या घटनेने खळबळ उडाली आहे. दरम्यान, पत्नीला मारून ५२ लाख रुपयांची विम्याची रक्कम मिळवण्याचं स्वप्न पाहणारा पती आणि त्याच्या चार सहकाऱ्यांना पोलिसांनी बेड्या ठोकल्या आहेत.
याबाबत डीएसपी राजवीरसिंह यांनी दिलेल्या माहितीनुसार ही घटना १२ मे रोजी रात्री घडली होती. नवलगड पोलीस ठाण्याच्या हद्दीतील कारी गावाजवळ सहीराम सैनी या इसमाने पत्नी कृष्णा सैनी हिचा रस्ते अपघातात मृत्यू झाला असल्याचा बनाव रचला. मात्र फॉरेन्सिक अहवाल आमि समोर आलेल्या पुराव्यांमुळे तो पुरता अडकला. त्यानंतर पोलिसांनी सहीरामसह त्याचे चार सहकारी असलेल्या सचिन, मुकेश, प्रदीप आणि अमृत यांच्यावर अटकेची कारवाई केली.
याबाबत मिळालेल्या अधिक माहितीनुसार आरोपी सहीराम याने ११ मे रोजी त्याच्या पत्नीला नवलगड बस स्टँडवर सोडले. त्यानंतर त्याच दिवशी भगेरा गावातील एका कॅफेमध्ये जाऊन सचिन कुमावत याला ५० लाख रुपये रोख आणि १ रिकाम चेक दिला आणि पत्नीची हत्या करण्याची सुपारी दिली. त्यानंतर सचिन याने त्याच्या टोळीसोबत मिळून एक भयंकर कट आखला.
१२ मे रोजी रात्री ठरलेल्या योजनेनुसार सहीराम हा दुचाकीवर पत्नीला बसवून आला. तसेच त्याने बडवासा गावाजवळ जाणीवपूर्वक दुचाकी पाडली. त्यामुळे कृष्णा सैनी ही रस्त्यावर पडली. त्यानंतर मागून कारमधून आलेल्या सचिन आणि त्याच्या सहकाऱ्यांनी तिच्यावर दगडांनी हल्ला केला. त्यात कृष्णा हिचा घटनास्थळीच मृत्यू झाला.
त्यानंतर सहीराम याने त्वरित रुग्णवाहिकेला बोलावून अपघाताचं नाटक केलं. तसेच १३ मे रोजी स्वत:च पोलीस ठाण्यात जात पत्नीला भरधाव कारने टक्कम मारल्याचं सांगितलं. मात्र पोलिसांना तो रचून सांगत असलेल्या कहाणीवर संशय आला. पोलिसांनी घटनास्थळी केलेला तपास आणि शवविच्छेदन अहवालामुळे सहीराम याचं पितळ उघडं पडलं. त्यानंतर पोलिसांनी त्याला ताब्यात घेऊन कसून चौकशी केली. तेव्हा सहीराम याने गुन्हा कबुल केला. तसेच ५२ लाख रुपयांच्या विम्यासाठी पत्नीची हत्या केल्याचे पोलिसांना सांगितले.