सुधारित... लैंगिक अत्याचार करणार्‍या सावंतवर बलात्काराचा गुन्हा दाखल

१३ वर्षीय मुलीवर तीन वर्षांपासून बलात्कार : पोलीस तपासात निष्पन्न
पुणे : खाऊच्या आमिषाने अल्पवयीन मुलींशी अश्लील चाळे करणारा आयएएस अधिकारी मारुती हरी सावंत (वय ५८) एका तेरा वर्षीय मुलीवर तीन वर्षांपासून बलात्कार करीत असल्याचा धक्कादायक प्रकार समोर आला आहे. सावंतवर पोलिसांनी बलात्काराचा गुन्हाही दाखल केला असून पीडित मुलींची वैद्यकीय तापासणीही केली आहे. दरम्यान, शुक्रवारी न्यायालयात आणले असता आवारातच महाराष्ट्र नवनिर्माण सेनेच्या नगरसेविकांनी त्याला चपलांचा हार घातला. न्यायालयाने सावंत याला ११ दिवसांची पोलीस कोठडी सुनावली आहे.
वरिष्ठ पोलीस निरीक्षक बळवंत काशीद यांनी दिलेल्या माहितीनुसार, पोलिसांनी गुरूवारी सावंत याला अटक केली. त्याने दुसरीतील दोन आणि सातवीतील तीन विद्यार्थिनींवर लैंगिक अत्याचार केल्याचा आरोप ठेवण्यात आला होता. सातवीतील तेरा वर्षांच्या मुलीवर तो तीन वर्षांपासून बलात्कार करत होता, अश्लील सीडीही दाखवीत होता. महाराष्ट्र राज्य कृषी शिक्षण आणि संशोधन परिषदेचा महासंचालक असलेल्या सावंत याने हिंगणे परिसरातील सासर्‍याच्या मालकीच्या सदनिकेत हा घृणास्पद प्रकार केला. मुलींनी शाळेत समुपदेशनादरम्यान घडलेल्या गैरप्रकाराची माहिती दिली होती. शाळेने नगरसेवक श्रीकांत जगताप यांना कळविल्यावर सावंतवर गुन्हा दाखल झाला.
विशेष न्यायालयाच्या न्यायाधीश मंगला धोटे यांच्या कोर्टासमोर सावंत याला हजर करण्यात आले. सावंतवर कलम ३७६, ३५४ (अ)(ब), ५०६ , बाल लैंगिक अत्याचार कायदा कलम ४,६,८ आणि १०, माहिती तंत्रज्ञान कायदा कलम ६७ (अ), (ब) , ॲट्रासिटी कायदा कलम ३(१),(११)(१२), ३ (२)(५) नुसार गुन्हा दाखल करण्यात आला. सावंतच्या घरामधून अश्लील सीडी आणि संगणक जप्त करण्यात येणार आहे. सावंतने हा प्रकार नेमका कधीपासून केला आहे, त्याने आणखी काही मुलींसोबत अशाच पद्धतीने अत्याचार केले आहेत काय आदी तपासासाठी त्याच्या पोलीस कोठडीची मागणी सरकारी वकील लीना पााठक यांनी केली होती. ती न्यायालयाने मान्य करून त्याला ११दिवसाची पोलीस कोठडी सुनावली. दरम्यान पोलिसांनी पिडीत मुलींची वैद्यकीय चाचणीही करुन घेतली आहे. शुक्रवारी त्याला न्यायालयात हजर करण्यात आले. पोलीस बंदोबस्तामध्येच मनसेच्यानगरसेविकांनी सावंतला चपलांचा हार घातला. या सर्वजणींना अटक करण्यात आली होती. संध्याकाळी त्यांची सुटका करण्यात आली.

--------