ऑनलाइन लोकमत
नवी दिल्ली, दि. 23 - अभिनेते आणि भाजपा खासदार परेश रावल यांनी लेखिका आणि समाजसेवी कार्यकर्त्या अरुंधती रॉय यांच्याबद्दल वादग्रस्त टि्वट केल्यानंतर मंगळवारी सोशल मीडियावर हा मुद्दा चांगलाच गाजला. अरुंधती रॉय यांनी परेश रावल यांच्या ट्विटला उत्तर देताना आपल्याला अशा टीकेमुळे फरक पडत नाही असं सांगितलं आहे. जर अशा लोकांना मी आवडू लागली तर तो माझा अपमान असेल असा टोलाही त्यांनी यावेळी मारला.
अरुंधती रॉय यांनी मुंबई मिररशी बोलताना सांगितलं आहे की, "मी एखाद्या विषयावर आपलं मत मांडत आहे. त्यावर लोक प्रतिक्रिया देत आहेत. तुमच्यासाठी प्रत्येकजण उभा राहून टाळ्या वाजवेल अशी अपेक्षा तुम्ही करु शकत नाही".
ज्या लष्करी अधिका-याने दगडफेक करणा-या जमावापासून बचाव करण्यासाठी काश्मिरी युवकाला जीपला बांधून मानवी ढालीसारखा वापर केला. त्या अधिका-याने युवकाऐवजी अरुंधती रॉय यांना जीपला बांधायला हवे होते असे टि्वट परेश रावल यांनी केले होते.
Instead of tying stone pelter on the army jeep tie Arundhati Roy !— Paresh Rawal (@SirPareshRawal) May 21, 2017
अरुंधती रॉय आपल्या वादग्रस्त वक्तव्यामुळे अनेकदा चर्चेत आल्या आहेत. "विरोधामुळे मला काही फरक पडत नाही. माझ्या समर्थकांची संख्या जास्त आहे. मी जेव्हा पंजाबमध्ये जाते तेव्हा हजारो लोक माझं समर्थन करतात. ओडिशातही अशीच परिस्थिती आहे", असं अरुंधती रॉय बोलल्या आहेत. "जर नकारामुळे मला वाईट वाटतं असं लोकांना वाटत असेल तर त्यांनी विचार करण्याची गरज आहे. अशा लोकांना माझं काम आवडत असेल तर तो माझा अपमान असेल", असंही त्या बोलल्या आहेत.
परेश रावल यांनी महिन्याभरापूर्वीच्या या घटनेवर आता का भाष्य केलेय ? ते कळायला आधार नाहीय. पण परेश रावल यांच्या विधानाने काँग्रेसच्या हाती आयते कोलीत दिले आहे. परेश रावल हे अहमदाबाद पूर्व लोकसभा मतदारसंघातून खासदार आहेत. अरुंधती रॉय या लेखिका असण्याबरोबरच सामाजिक कार्यकर्त्या म्हणूनही त्यांची ओळख आहे.
काश्मीरमधील मानवी हक्कांबद्दल त्यांनी अनेकदा प्रश्न उपस्थित केले आहेत. त्यांच्या भूमिकेवर अनेकांना आक्षेप आहे. 1997 साली अरुंधती रॉय यांच्या द गॉड ऑफ स्मॉल थिंगस या कादंबरीला बुकर पारितोषिक मिळाले आणि हे नाव सर्वांच्याच परिचयाचे झाले. काश्मीरमध्ये सीआरपीएफच्या जवानांना जमावाकडून मारहाण होत असल्याचा व्हिडीओ व्हायरल झाल्यानंतर संपूर्ण देशात एकच संतापाची लाट उसळली. त्यानंतर जम्मू-काश्मीरचे माजी मुख्यमंत्री ओमर अब्दुल्ला यांनी काश्मिरी युवकाला जीपला बांधल्याचा व्हिडीओ आणि फोटो टि्वट करुन काश्मीरमधली दुसरी बाजू दाखवण्याचा प्रयत्न केला होता.