पत्नीच्या प्रेमात वेडावलेल्या पतीनं धरली ११ हजार हाय व्होल्टेज विजेची तार; दोन्ही हात गमावले

पतीला सासरी परत आणण्यासाठी तिच्या माहेरी गेलेल्या पतीनं गमावले दोन्ही हात

शामली: माहेरी गेलेल्या पत्नीनं घरी परतावं यासाठी तिची समजूत काढायला गेलेल्या पतीसोबत धक्कादायक प्रकार घडला आहे. पत्नीच्या प्रेमात वेडा झालेला पती तिचं मन वळवण्यासाठी माहेरी पोहोचला. पत्नीच्या सांगण्यावरून त्यानं ११ हजार हाय व्होल्टेजचा विद्युत प्रवाह असलेली तार  हाती धरली. सुदैवानं त्याचा जीव वाचला. मात्र त्याला दोन्ही हात गमवावे लागले. नदीम असं या इसमाचं नाव आहे. आता त्याच्या पत्नीचे कुटुंबीय तिला सासरी पाठवण्यास तयार नाहीत. उत्तर प्रदेशातील शामली जिल्ह्यातील कैरानामध्ये हा प्रकार घडला आहे. 

कैरानातील नदीमचं कांधलामध्ये वास्तव्यास असलेल्या सायमासोबत सात वर्षांपूर्वी सूत जुळलं. गेल्या वर्षी त्यांचा निकाह संपन्न झाला. काही दिवसांपूर्वी सायमा नदीमला सोडून माहेरी आली. नदीमनं तिला घरी परत येण्याची विनंती केली. मात्र तिनं नदीमची परीक्षा घेण्यास सुरुवात केली. 

तू माझ्यासाठी काय करू शकतो अशी विचारणा सायमानं नदीमकडे केली. त्यावर मी तुझ्यासाठी जीवदेखील देऊ शकतो असं उत्तर त्यानं दिलं. त्यानंतर सायमानं नदीमला ११ हजार व्होल्टेजचा विद्युत प्रवाह असलेली तार पकडण्यास सांगितली. पत्नीच्या प्रेमात वेडावलेल्या नदीमनं विजेची तार पकडली आणि त्याला जबरदस्त शॉक लागला. नदीमचा जीव वाचला असला तरीही त्यानं दोन्ही हात गमावले.

आता सायमचे कुटुंबीय आणि नातेवाईक तिला नदीमसोबत पाठवण्यास तयार नाहीत. त्यामुळे नदीमनं पत्नीला पुन्हा सासरी आणण्यासाठी पोलिसांकडे मदत मागितली. सासरची मंडळी मारहाण आणि शिवीगाळ करत असल्याचा आरोप करणारा अर्ज त्यानं पोलीस अधीक्षकांना दिला. 'माझं माझ्यावर पत्नीवर नितांत प्रेम आहे. तिचा चेहरा बघून मी माझं संपूर्ण आयुष्य काढेन,' असं नदीमनं पोलिसांना दिलेल्या अर्जात म्हटलं आहे.