Himachal Pradesh Election Result 2022: आज गुजरात आणि हिमाचल प्रदेश विधानसभा निवडणुकांचे निकाल लागले. गुजरातमध्ये प्रचंड बहुमताने भाजपचा विजय झाला आहे, मात्र हिमाचलमध्ये सत्ता गमवावी लागली आहे. हिमाचलमध्ये काँग्रेसने 40 तर भाजपने 25 जागा जिंकल्या आहेत. भाजपच्या विजयी उमेदवारांमध्ये अभिनेता सलमान खानच्या बहिणीचे सासरेदेखील आहेत.
गुजरातमध्ये गेल्या दोन दशकांपासून सुरू असलेला भाजपचा विजयाचा ट्रेंड कायम असून, हिमाचल प्रदेशमध्येही सत्ताबदलाचा ट्रेंड कायम राहिला आहे. हिमाचल प्रदेशमध्ये दर पाचवर्षांनी आलटून-पालटून भाजप-काँग्रेसचे सरकार येत असते. गेल्या वेळेस भाजपने तर यंदा काँग्रेसने बाजी मारली आहे.
आयुष शर्माचे वडील विजयीहिमाचल प्रदेशात काँग्रेसने 40 आणि भाजपाने 25 जागा जिंकल्या आहेत. या निवडणूक निकालाचे सलमान खानशी एक कनेक्शन आहे. सलमान खानची बहिण अर्पिताचे सासरे हिमाचल प्रदेश विधानसभा निवडणुकीत विजयी झाले आहेत. बॉलिवूड अभिनेता आयुष शर्माने हिमाचल विधानसभा निवडणुकीचा निकाल जाहीर झाल्यानंतर इन्स्टाग्रामवरुन वडिलांना विजयाच्या शुभेच्छा दिल्या.
भाजपच्या तिकीटावर विजयीआयुष शर्माचे वडिल अनिल शर्मा यांनी भाजपाच्या तिकीटावर निवडणूक लढवली होती. हिमाचल प्रदेशच्या मंडी मतदारसंघातून त्यांनी निवडणूक जिंकली. वडिलांच्या विजयाने आनंदीत झालेल्या आयुषने इंस्टाग्राम स्टोरीमधून मतदारांचे आभार मानले. विशेष म्हणजे आयुष राजकीय कुटुंबातून येतो. शर्मा कुटुंब गेल्या अनेक वर्षांपासून हिमाचलच्या राजकारणात सक्रिय आहे.