उत्तर भारतात ऊन-पावसाचा खेळ, ९ राज्यांत पावसाचा इशारा; तर राजस्थानात पारा चढला

दिल्ली-राजस्थानसह उत्तर भारतात काही राज्यांत उन्हाचा कडाका वाढू लागला आहे. मध्य प्रदेश व राजस्थानातील काही भागांत तापमान ३९ अंशांपर्यंत पोहचले आहे.

नवी दिल्ली : दिल्ली-राजस्थानसह उत्तर भारतात काही राज्यांत उन्हाचा कडाका वाढू लागला आहे. मध्य प्रदेश व राजस्थानातील काही भागांत तापमान ३९ अंशांपर्यंत पोहचले आहे. तर बिहार व झारखंडमध्ये वादळी वाऱ्यासह पावसाचा येलो अलर्ट देण्यात आला आहे.

पश्चिम बंगाल व उत्तर ओडिशाच्या किनारपट्टीवर सध्या कमी दाबाचा पट्टा निर्माण होत असून, याचा परिणाम बंगाल, आसाम व मेघालयाच्या काही भागांत हलका पाऊस होत आहे. मंगळवारी हिमाचल-उत्तराखंड, काश्मीरच्या काही भागांत पावसाचा इशारा दिला आहे.

१४ मार्चपर्यंत पावसाची शक्यता 

१४ मार्चपर्यंत जम्मू-काश्मीर, हिमाचल प्रदेश, उत्तराखंड, बिहार, झारखंड, प. बंगाल आणि ओडिशा या राज्यांत ढगांचा गडगडाट व विजेच्या कडकडाटासह हलका पाऊस पडण्याची शक्यता हवामानशास्त्र विभागाने व्यक्त केली आहे. पंजाब-हरियाणात हवामान कोरडे असून, येत्या दोन-तीन दिवसांत तापमानात वाढ होण्याची शक्यता आहे. 

दक्षिणेत उकाडा वाढला

उत्तरेत तापमानात वाढ होताच दक्षिण भारतातही उष्णता व उकाडा वाढला असून, तामिळनाडूत याचे प्रमाण अधिक आहे. आंध्र प्रदेश आणि तेलंगणात उकाडा जाणवत असला तरी उन्हाचा कडाका नाही. महाराष्ट्रातही अनेक जिल्ह्यांत पारा वाढत असल्याचे जाणवते.  

हवामानाचा अंदाज...

राजस्थान व सौराष्ट्र-कच्छ भागात मंगळवारपर्यंत उष्णता प्रचंड जाणवेल. हिमाचल प्रदेशचा काही भाग ते महाराष्ट्राच्या विदर्भ व उत्तरेकडील भागांत बुधवार-गुरुवारपर्यंत उन्हामुळे उकाडा वाढेल. 

राजस्थान, गुजरातसह महाराष्ट्राच्या काही भागांत तीन-चार दिवसांत तापमानात २ ते ३ अंशांची वाढ होण्याची शक्यता आहे. 

११ मार्चपर्यंत पश्चिम हिमालयीन क्षेत्रामध्ये हलका पाऊस तर काही भागात बर्फवृष्टीची शक्यता वर्तवण्यात आली आहे.