क्रेडिट कार्डांचे बिल थकल्यानं त्यानं चार वर्षांच्या मुलीला घेऊन मारली गच्चीवरून उडी

सुरेशचा जागीच मृत्यू झाला असून, मुलीचे दोन्ही पाय अधू झाले आहेत.

दिल्ली: क्रेडिट कार्डचे बिल थकवल्याने दिल्लीतील जगतपुरीमध्ये राहणाऱ्या 35 वर्षीय सुरेश कुमारने आपल्या 4 वर्षांच्या मुलीसह राहत्या चार मजली इमारतीच्या गच्चीवरून उडी मारून आत्महत्येचा प्रयत्न केला आहे. यामध्ये सुरेशचा जागीच मृत्यू झाला असून, मुलीचे दोन्ही पाय अधू झाले आहेत.

मिळालेल्या माहितीनुसार, सोमवारी दुपारी 3 वाजताच्या सुमारास सुरेश आपल्या मुलीला घेऊन राहत्या इमारतीच्या गच्चीवर गेला. त्यानंतर गच्चीवर जाऊन त्यानं मुलीबरोबर उडी मारून आत्महत्येच्या प्रयत्न केला. या घटनेत सुरेशचा जागीच मृत्यू झाला, तर 4 वर्षांची मुलगी दोन्ही पायांनी अधू झाली. तसेच हा सर्व प्रकार पाहून सुरेशची पत्नी मनजीत कौर हिने देखील गच्चीवरून उडी मारली आणि तीसुद्धा जबर जखमी झाली आहे.  

त्याची पत्नी मनजीतने सांगितले की, सुरेश गुरुग्रामच्या एका खासगी कंपनीमध्ये काम करायचा. त्यामुळे त्याच्याकडे विविध बँकांचे क्रेडिट कार्ड होते. त्या क्रेडिट कार्डचे बिल जवळपास 8 लाख रुपये झाल्याने ही रक्कम परतफेड करण्यासाठी त्याच्याकडे पैसे नव्हते. तसेच बँकांकडून वारंवार कॉल व मॅसेज येत असल्यामुळे तो कंटाळून गेला होता. त्यामुळेच त्याने आत्महत्या करण्यासारखे टोकाचे पाऊल उचलल्याचे तिने सांगितले.