नवी दिल्ली - पंतप्रधान नरेंद्र मोदी यांचा आज 68 वा वाढदिवस आहे. मोदी त्यांचा वाढदिवस त्यांचा लोकसभा मतदारसंघ असलेल्या वाराणसीमध्ये साजरा करणार आहेत. यानिमित्ताने वाराणसीत विविध कार्यक्रमांचं आयोजन करण्यात आलं आहे. एका स्वयंसेवी संस्थेकडून चालवण्यात येणाऱ्या शाळेतील विद्यार्थ्यांसोबत आज पंतप्रधान मोदी एका कार्यक्रमात सहभागी होणार आहेत.
वाढदिवसानिमित्त पंतप्रधान मोदी काशी विश्वनाथ मंदिरात जाऊन भगवान शंकराचे दर्शन घेतील. त्यानंतर ते शाळकरी मुलांसोबत 'चलो जिते है' हा लघुपट पाहतील. हा लघुपट मोदींच्या आयुष्यावर आधारित आहे. मागील वाढदिवसाला मोदींनी गांधीनगरला जाऊन त्यांच्या आईची भेट घेतली होती. यानंतर त्यांनी सरदार सरोवराचं लोकार्पण केलं होतं.
गेल्या वर्षीप्रमाणेच यावर्षीही मोदी अनेक नव्या प्रकल्पांचं लोकार्पण करणार आहेत. यामध्ये बाबतपूर-शिवपूर रस्त्याचं विस्तारीकरण, रिंग रोडचा पहिला टप्पा यांच्यासह बनारस हिंदू विद्यापीठातील काही प्रकल्पांचा समावेश आहे. मोदी यांच्या वाराणसी भेटीच्या पार्श्वभूमीवर काल उत्तर प्रदेशचे मुख्यमंत्री योगी आदित्यनाथ यांनी शहरातील सुरक्षेचा आढावा घेतला.
पंतप्रधान नरेंद्र मोदी यांचा वाराणसीतील कार्यक्रम- पंतप्रधान नरेंद्र मोदी आज संध्याकाळी 5 वाजता रोहनियाच्या नरउर गावातील प्राथमिक शाळेतील विद्यार्थ्यांसोबत संवाद साधणार आहेत. - संध्याकाळी 7 वाजता डीएलडब्ल्यू गेस्ट हाऊसमध्ये काशी विद्यापीठातील विद्यार्थ्यांसोबत संवाद साधणार आहेत. - 18 सप्टेंबरला सकाळी 10 वाजता वारासणीत जवळपास 557 कोटींच्या प्रकल्पांचे लोकार्पण तसंच भूमिपुजन करणार आहेत.