मध्य प्रदेशच्या रेवा जिल्ह्यातील एक व्हिडीओ सोशल मीडियावर जोरदार व्हायरल झाला आहे. लग्नाच्या वरातीत नाचताना नवरदेवाच्या मित्राचा मृत्यू झाला आहे. डान्स करताना तो जमिनीवर पडतो, त्यानंतर उठत नाही. या घटनेचा व्हिडीओ सोशल मीडियावर व्हायरल झाला आहे. या तरुणाला हृदयविकाराचा झटका आल्याचं म्हटलं जात आहे. या घटनेने एकच खळबळ उडाली आहे.
मिळालेल्या माहितीनुसार, लग्नाची वरात ही कानपूरहून रीवा येथे आली होती. बँडबाजाच्या तालावर पाहुणे मंडळी नाचत लग्नाच्या ठिकाणाकडे निघाले होते. तेव्हा वरातीत सहभागी असलेला 32 वर्षीय अभय सचान आनंदाने नाचत होता. डान्स सुरू असताना तो अचानक जमिनीवर पडला आणि त्यांचा मृत्यू झाला. या घटनेनंतर संपूर्ण आनंदाचे शोकाकुल वातावरणात रुपांतर झाले.
मंगळवारी रात्री उत्तर प्रदेशातील कानपूर येथून रीवा बस स्थानकाजवळील अमरदीप पॅलेसमध्ये वरात आली. नवरी रेवा येथील रहिवासी आहे. नवरदेवाचा मित्र अभय सचानही लग्नात सहभागी होण्यासाठी कानपूरहून रीवाला आला होता. रात्री 12 वाजण्याच्या सुमारास सर्व नातेवाईक गात, नाचत जात होते. कडाक्याच्या थंडीत अभय सचानही इतर लोकांसह नाचत होता. काही वेळाने तो नाचत असताना अचानक खाली पडला, त्यानंतर घटनास्थळी एकच खळबळ उडाली. बँड लगेचच बंद करण्यात आला.
अभयला तातडीने संजय गांधी मेमोरियल हॉस्पिटलमध्ये नेण्यात आले मात्र तोपर्यंत अभयचा मृत्यू झाला होता. या घटनेचा व्हिडीओही समोर आला आहे, ज्यामध्ये तो नाचत करताना जमिनीवर पडला होता. अभय हा एजी आवास विकास कॉलनी, हंसापुरम, कानपूर, यूपीचा रहिवासी होता. घटनेची माहिती मिळताच नातेवाईक रेवा येथे आले. रुग्णालयात शवविच्छेदन करून मृतदेह नातेवाईकांच्या ताब्यात देण्यात आला आहे. एका हिंदी वेबसाईटने याबाबतचे वृत्त दिले आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"