मोदींसाठीच्या पर्यायी विमानात ग्रेनेड आढळल्याने खळबळ

पंतप्रधान नरेंद्र मोदी यांच्या अमेरिका दौ-यासाठी ठेवलेल्या पर्यायी विमानात निकामी ग्रेनेड आढळल्याने खळबळ माजली आहे.

ऑनलाइन लोकमत

नवी दिल्ली, दि. ४ - पंतप्रधान नरेंद्र मोदी यांच्या अमेरिका दौ-यासाठी ठेवलेल्या पर्यायी विमानात निकामी ग्रेनेड आढळल्याने खळबळ माजली आहे. सुरक्षा व्यवस्थेतील ही गंभीर चूक मानली जात आहे. 

मोदी नुकतेच पाच दिवसांच्या अमेरिका दौ-यावर जाऊन आले. याच दौ-यासाठी ‘एअर इंडिया‘चेच आणखी एक विमान राखीव म्हणून ठेवण्यात आले होते. पंतप्रधानांच्या विमानात काही अडचणी आल्या असत्या तर हे अतिरिक्त विमानाचा उपयोग केला गेला असता. मात्र कोणतीही तांत्रिक अडचण न आल्याने या विमानाचा वापर केला गेला नाही. पंतप्रधानांचा अमेरिका दौरा पूर्ण झाल्यावर हे विमान पुन्हा प्रवासी वाहतूक सेवेत दाखल करण्यात आले. 

सूत्रांनी दिलेल्या माहितीनुसार हे  विमान दिल्ली-मुंबई-हैदराबाद-जेद्दाला पाठवण्यात आले.  जेद्दा येथे पोहचल्यानंतर सुरक्षा रक्षकांना विमानात निकामी ग्रेनेड आढळला. पंतप्रधानांसाठी वापरण्यात येणा-या विमानात ग्रेनेड आढळल्याने सुरक्षा एजन्सीत मोठी खळबळ माजली असून याप्रकरणी कसून चौकशी होत आहे.