नवी दिल्ल्ली : रेल्वेतून प्रवास करताना एका मल्याळम अभिनेत्रीसोबत छेडछाड झाल्याची घटना समोर आली आहे. मावेली एक्सप्रेममधून प्रवास करताना ही घटना घडली. यावेळी तिच्या मदतीला कोणीही आले नाही. मात्र, छेडछाड करणा-या आरोपीला या अभिनेत्रीने टीटीई येईपर्यंत पकडून ठेवले होते. सानुशा संतोष असे या मल्याळम अभिनेत्रीचे नाव आहे. 23 वर्षीय सानुशा संतोष मावेली एक्सप्रेसमधून प्रवास करत होती. यावेळी ती एक्सप्रेसमधील वरच्या बर्थवर झोपली असताना एका व्यक्तीने तिच्याशी छेडछाड केली. यादरम्यान तिने मदतीसाठी इतर प्रवाशांना आवाज दिला. मात्र, तिच्या मदतीसाठी कोणीही धावून आले नाही. दरम्यान, या घडलेल्या प्रकाराबद्दल तिने एनडीटीव्हीला दिलेल्या माहितीनुसार ती म्हणाली की, एक्सप्रेसमध्ये प्रवासादरम्यान झोपले असताना माझ्या ओठांवर काहीतरी असल्याचे जाणवले. यावेळी मला जाग आली असता एका व्यक्ती हात माझ्या ओठांवर असल्याने मला भीती वाटली. मात्र, त्या व्यक्तीचा मी हात पकडला आणि मदतीसाठी बाजूच्या प्रवाशांकडे मदतीसाठी आवाज दिला. यावेळी बाजूच्या प्रवाशांनी माझी मदत केली नाही. त्यानंतर काही वेळानंतर फक्त स्क्रिप्ट रायटर आणि एक जण प्रवासी माझ्या मदतीला आले. ही घटना साधारणत: रात्री एक वाजताच्या सुमारास घडली, असे सानुशा संतोषने सांगितले. छेडछाड करणा-या व्यक्तीला सानुशा संतोषने टीटीई येईपर्यंत पकडून ठेवले होते. त्यानंतर टीटीई आल्यानंतर त्यांनी पुढच्या स्टेशनला घडलेल्या प्रकाराची माहिती दिली आणि पोलिसांना कळविले. दरम्यान, याप्रकरणी सानुशा संतोष हिने तक्रार दाखल केली असून पोलिसांनी आरोपीला अटक केली आहे.
गेल्या काही दिवसांपूर्वी बॉलिवूडचा मिस्टर परफेक्शनिस्ट अभिनेता आमिर खानच्या 'दंगल' सिनेमात कुस्तीपटू गीता फोगाटच्या बालपणीची भूमिका करणारी काश्मीरी अभिनेत्री झायरा वसीमशी विमानामध्ये असभ्य वर्तन केल्याची माहिती समोर आली होती. झायरा वसीमनं आपल्या इनस्टाग्रामच्या पोस्टवरुन ही माहिती दिली होती. झायरा नवी दिल्ली ते मुंबई असा विस्तारा एअरलाइनन्सने प्रवास करत असताना तिच्यासोबत एका सहप्रवाशानं असभ्य वर्तन केले होते. विमानात आपल्या जागेवर झायरा झोपलेली असताना अगदी तिच्या मागच्या सीटवर बसलेल्या एक पुरुष प्रवासी तिच्या सीटवर मानेजवळ आपला पाय टाकून झोपला होता. तसेच तो झायराला पायाने स्पर्श करण्याचा प्रयत्नही करीत होता. या प्रकारामुळे झायरा घाबरुन गेली होती. हा प्रकार घडत असताना झायराने विमानाच्या क्रू मेंबर्सना याबाबत माहिती दिली. मात्र, त्याचाही काहीही उपयोग झाला नाही. तिच्या मदतीला कोणीही धाऊन आले नाही, असा आरोपही तीने केला आहे. या घटनेचे चित्रीकरण करण्याचा प्रयत्नही तीने केला. मात्र, विमानातील अंधूक प्रकाशामुळे तिला ते शक्य झाले नाही. दरम्यान, याप्रकरणी असभ्य वर्तन करणा-या प्रवाशाला पोलिसांनी अटक केली होती.