बरेली- उन्नाव, कथुआ, सूरतनंतर आता उत्तर प्रदेशातील संभळमध्ये घडलेली घटना काळजाला चटका लावणारी आहे. तेथे 2010 साली एका आठ वर्षांच्या मुलीला तिच्या आई-वडिलांनीच राजस्थानमधील एका माणसाला विकल्याची धक्कादायक घटना समोर आली आहे. पीडित मुलगी आता 16 वर्षांची असून ती चार मुलांची आई आहे. याप्रकरणी पीडित मुलीने वडील, सावत्र आई व मावशीविरोधात तक्रार दाखल केली आहे. टाइम्स ऑफ इंडियाने हे वृत्त दिलं आहे.
पोलिसात दाखल केलेल्या तक्रारीनुसार, पीडित मुलीच्या आई-वडिलांनी तिला 2010 साली भरतपूरमधील एका माणसाला विकलं. त्याचबरोबर पीडित मुलीच्या सहा व चार वर्षांच्या दोन लहान बहिणींनाही राजस्थानमधील माणकाकडे विकलं. 2010 साली पीडित मुलीला विकल्यावर तेथे तिच्यावर तब्बल आठ वर्ष सतत बलात्कार झाला. त्यामध्ये तिने चार मुलांना जन्म दिला आहे. तिच्यावर होणारे अत्याचार असह्य झाल्यावर पीडित मुलीने भरतपूरमधील तिच्या घरातून पळ काढच संभळमधील नातेवाईकांचं घर गाठलं.
पीडित मुलीने दिलेल्या माहितीनुसार, आईचं निधन झाल्यानंतर 2010 साली तिच्या वडिलांनी दुसरं लग्न केलं. घरी आलेल्या सावत्र आईने मला सतत त्रास द्यायला सुरूवात केली. पीडित मुलीला तीन बहिणी व एक भाऊ आहे. सावत्र आईने मला व माझ्या दोन लहान बहिणींना तिच्या राजस्थानमधील बहिणीच्या घरी नेलं. त्यानंतर राजस्थानमधील एका 50 वर्षीय माणसाकडे मला 3 लाख रुपयांना विकलं. माझं त्याच्याशी लग्न लावून दिलं व माझं नाव बदललं. सहा वर्षात मी चार मुलांना जन्म दिला. पण त्यापैकी दोन मुलांचा त्यांच्या जन्माच्या एका महिन्यातच मृत्यू झाला, पीडित मुलीने पोलिसांना दिलेल्या जबाबात ही माहिती दिली आहे.
पीडित मुलीला वैद्यकीय तपासणीसाठी पाठविण्यात आलं असून मुलीवर बलात्कार झाल्याने तिने मुलांना जन्म दिल्याचा प्राथमिक अंदाज आहे, असं पोलीस अधिकारी सुदेश कुमार यांनी सांगितलं.
दरम्यान, पोलिसांनी मुलीचे वडील, सावत्र आई, मावशी व तिला विकत घेणाऱ्या व्यक्तीच्या विरोधात तक्रार दाखल केली असून त्यांना अटक करण्याचे प्रयत्न सुरू केले आहेत.