गेल्या वर्षी पाकिस्तानातून चुकीच्या पद्धतीने भारतात आलेल्या सीमा हैदरने नोएडातील रबुपुरा येथे सचिनसोबत लग्नाचा वाढदिवस साजरा केला. सीमा आणि सचिनचा दावा आहे की, दोघांनी गेल्या वर्षी 12 मार्च रोजी नेपाळमधील एका मंदिरात लग्न केलं होतं. त्यांच्या लग्नाला आता एक वर्ष झालं आहे. एकीकडे सचिन आणि सीमाने त्यांच्या लग्नाचा वाढदिवस मोठ्या थाटामाटात साजरा केला तर दुसरीकडे गुलाम हैदरच्या वकिलाने या केससाठी हे फायदेशीर असल्याचं म्हटलं आहे.
सीमाचा पाकिस्तानी पती गुलाम हैदरचे वकील मोमीन मलिक म्हणाले की, "लग्नाचा वाढदिवस हा त्यांच्या वतीने सीमावर लावण्यात आलेल्या आरोपांचा पुरावा आहे. त्यांनी व्हिडीओ शेअर केला असून त्यामध्ये "हे आमच्याकडून टाकलेलं जाळं होतं. जसं मासे पकडण्यासाठी जाळं टाकलं जातं, तसं आम्ही हे कायदेशीर जाळं टाकलं होतं. सीमा यात अडकली आहे. आता सीमाला 100 टक्के तुरुंगवास भोगावा लागेल. आता सीमाला तुरुंगात टाकले जाईल आणि तिच्यासोबत असलेल्या चार मुलांना पाकिस्तानात पाठवले जाईल."
"मी कोर्टात माझ्या अर्जात म्हटलं आहे की सीमाने जामिनाची कागदपत्रे बनावट केली आहेत. आता व्हिडीओ आला आहे आणि कोर्टाला हे मान्य करावं लागेल. सीमाचा हा आनंद एक-दोन दिवसांसाठी आहे. आता न्याय होणार आहे. भारतीय कायदा इतका कमकुवत नाही की सीमाप्रमाणे घुसखोरी करून कोणीही फसवू शकेल. तिला शिक्षा होईल आणि लवकरच तुरुंगात टाकलं जाईल."
"कोर्टात जामिनासाठी सादर केलेल्या कागदपत्रांमध्ये सीमाने स्वतःला गुलाम हैदरची पत्नी असल्याचं सांगितलं आहे. पोलीस ठाण्यात नोंदवलेल्या एफआयआरमध्ये तिच्या पतीच्या नावाचाही गुलाम असा उल्लेख आहे. अशा परिस्थितीत ती आता सचिनसोबत राहून लग्नाचा वाढदिवस कसा साजरा करत आहे? भारतात येण्यापूर्वी तिचं लग्न सचिनशी झालं होतं तर जामिनावर तिने हैदरचं नाव का लिहिलं, ती कशाच्या आधारावर स्वत:ला सचिनची बायको म्हणवून घेत आहे? अशा स्थितीत तिच्याविरुद्ध फसवणुकीचा गुन्हा उघडकीस आला आहे" असं म्हटलं आहे.