बेळगाव - हुकेरी तालुक्यातील संकेश्वर येथे दुचाकी स्लिप होवून रस्त्यावर पडल्याने झालेल्या अपघातात सेवानिवृत्त सुभेदाराचा दुर्देवी मृत्यू झाला. मनोजकुमार गोविंद बिरंजे (वय ४८, रा. व्हन्नीहळ्ळी, ता. हुक्केरी, जि. बेळगाव) असे मृताचे नाव आहे.
अधिक माहिती अशी, बिरंजे हे कामानिमित्त होंडा अॅक्टीव्हा क्रमांक केए २३, ईओ ९६५१ वरून बेळगावला गेले होते. दरम्यान, काम आटोपून परत येत असताना गावापासून अवघ्या ४ कि. मी. अंतरावरील सोलापूरनजीक त्यांची दुचाकी स्लिप झाल्याने ते रस्त्यावर पडले. यामध्ये त्यांच्या डोकीला गंभीर दुखापत झाल्याने त्यांना उपचारासाठी बेळगावला नेत असताना त्यांचा वाटेतच मृत्यू झाला. त्यांच्या पश्चात पत्नी, मुलगा, मुलगी, दोन भाऊ, बहिण असा परिवार आहे. अपघाताची नोंद संकेश्वर पोलिसात झाली आहे.
२७ वर्षे देशसेवा
बिरंजे हे चार महिन्यापूर्वी जम्मू-काश्मिर येथे सैन्यदलाच्या सुभेदार पदावरून सेवानिवृत्त झाले होते. त्यांनी तब्बल २७ वर्षे देशसेवा बजावली होती. मनमिळावू असणाऱ्या बिरंजे यांच्या अपघाती मृत्यूने गावात हळहळ व्यक्त होत आहे.