जम्मू-काश्मीरमधील कुलगाम इथे दहशतवाद्यांशी झालेल्या चकमकीत पोलीस उपअधीक्षक अमन ठाकूर शहीद झाले आहेत. या गोळीबारात लष्कराचा एक जवान जखमी झाला असून तीन दहशतवाद्यांना कंठस्नान घातलंय.
कुलगाम जिल्ह्याच्या तुरीगाम भागात काही दहशतवादी लपल्याची माहिती मिळाली होती. त्यानंतर, सुरक्षा रक्षकांनी सर्च ऑपरेशन सुरू केलं. या पथकावर दहशतवाद्यांकडून गोळीबार करण्यात आला. त्याला जवानांनी चोख प्रत्युत्तर दिलं. परंतु, या चकमकीत अमन ठाकूर यांना वीरमरण आलंय. एक जवान जखमी असून त्याला हॉस्पिटलमध्ये दाखल करण्यात आलंय. दहशतवादी कोण आहेत आणि कुठल्या संघटनेचे सदस्य आहेत, याचा तपास सुरू आहे.
अमन ठाकूर हे जम्मू काश्मीर पोलिसांच्या स्पेशल टास्क फोर्समधील एक धडाकेबाज अधिकारी होते. गेल्या दोन वर्षांपासून ते काश्मीरमध्ये होते आणि अनेक ऑपरेशनचं नेतृत्व ते स्वतःहून करत असत. या धाडसी शिलेदाराला आज देश मुकला आहे.