उत्तर प्रदेशमध्ये एक अजब घटना आता समोर आली आहे. संभलच्या असमोली पोलीस ठाण्याच्या हद्दीत बुधवारी एक विचित्र प्रकार घडला आला. अमरोहा येथून वरात घेऊन आलेल्या तरुणाने असमोली परिसरातील गावात एका तरुणीशी मोठ्या थाटामाटात निकाह केला. मात्र यानंतर मोठा गोंधळ झाला. काही वेळातच दोघांचा तलाक झाला आणि या तरुणीचं लग्न नवरदेवाच्या लहान भावाशी झालं.
नवरदेवाची पहिली पत्नी अचानक तिथे आल्याने हा गोंधळ उडाल्याची माहिती मिळत आहे. हे प्रकरण पोलिसांपर्यंतही पोहोचलं. पोलिसांची कारवाई टाळण्यासाठी पंचायत बसली आणि पंचायतीच्या आदेशावरून अखेर हा अजब निर्णय घेण्यात आला. अमरोहा जिल्ह्यातील सैदगनली पोलीस स्टेशन हद्दीतील गावातला रहिवासी असलेल्या एका तरुणाचं चार वर्षांपूर्वी याच परिसरातील तरुणीसोबत निकाह झाला होता.
पतीसोबत वाद झाल्यानंतर महिला आपल्या माहेरी निघून गेली. दरम्यान, बुधवारी हा तरुण दुसऱ्या निकाहसाठी संभल जिल्ह्यातील असमोली परिसरात राहणाऱ्या एका गावात पोहोचला. निकाह पूर्ण झाला, इतक्यात तिथे तरुणाची पहिली पत्नी आली. महिलेने या लग्नाला विरोध करत गोंधळ घातला. महिलेने पोलीस ठाण्यात माहिती दिली. यावर पोलिसांनीही घटनास्थळ गाठून दुसरा निकाह करणाऱ्याला पकडून पोलीस ठाण्यात नेलं.
पोलिसांची कारवाई पाहून या प्रकरणावर तोडगा काढण्यासाठी पंचायत बोलवण्यात आली. पंचांनी फर्मान काढलं की त्या तरुणाने नुकतंच निकाह केलेल्या मुलीला तलाक द्यायचा आणि तिचं लग्न नवरदेवाच्या लहान भावासोबत लावायचं. पंचायतीच्या निर्णयानंतर नवरदेवाने तासाभरातच नवरीला तलाक दिला. त्यानंतर तरुणीचं नवरदेवाच्या लहान भावाशी लग्न झालं. निकाहच्या तासाभरात तलाक आणि दुसरं लग्न याची सर्वत्र जोरदार चर्चा रंगली आहे. एका हिंदी वेबसाईटने याबाबतचे वृत्त दिले आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"