आसामच्या धुबरी जिल्ह्यात अलीकडेच धार्मिक तणाव वाढला आहे. त्यावर मुख्यमंत्री हिमंत बिस्वा सरमा यांनी कठोर प्रतिक्रिया दिली. ईदच्या दिवशी काही समाजकंटकांनी धुबरीच्या हनुमान मंदिराबाहेर गोमांस फेकले. ही अत्यंत घृणास्पद आणि निंदनीय घटना आहे. एक विशेष वर्ग आमच्या मंदिरांना नुकसान पोहचवण्याच्या दृष्टीने सक्रीय झाला आहे. त्यामुळे या बेकायदेशीर समाजकंटकांना पाहताच गोळी मारण्याचे आदेश पोलिसांना दिल्याचे मुख्यमंत्र्‍यांनी सांगितले.
मुख्यमंत्री हिमंत बिस्वा सरमा पुढे म्हणाले की, पुढच्या ईदला जर आवश्यकता भासली तर मी स्वत: रात्रभर हनुमान मंदिराबाहेर पहारा देईन. धुबरीत नवीन गोमांस माफिया समोर आले आहेत. ज्यांनी ईदच्या आधी हजारो जनावरे खरेदी केली होती. पोलिसांचा तपास सुरू आहे. गुन्हेगारांना पोलीस कोठडीत टाकले जाईल. मी धुबरी दौरा केला आहे. तिथे आमच्या मंदिरांना आणि पवित्र स्थानांना अपवित्र करणाऱ्या समाज घटकांविरोधात झीरो टॉलरेंस धोरण वापरण्याचे निर्देश अधिकाऱ्यांना दिले आहे असं त्यांनी सांगितले.
तसेच शहरात कधीही मंदिराबाहेर गोमांस फेकण्याची घटना पुन्हा व्हायला नको, यात जे कुणी सहभागी असतील त्यांना सोडले जाणार नाही. आम्ही जिल्ह्यात कायदा सुव्यवस्था कायम राखून सर्व सांप्रदायिक ताकदीविरोधात लढण्यासाठी कटिबद्ध आहोत असं आसामचे मुख्यमंत्री हिंमत बिस्वा यांनी म्हटलं.
दरम्यान, नुकतेच आसाम आणि बांगलादेशात काही समाजकंटक सक्रिय झालेत. एक विशेष वर्ग ऑनलाईन आणि ऑन ग्राऊंड सक्रीय झाला आहे. सुनियोजितपणे राज्यात नकारात्मक वातावरण बनवण्याचा प्रयत्न करत आहेत असंही मुख्यमंत्री बिसवा यांनी सांगितले. आसामच्या धुबरी शहरात ८ जून रोजी एका मंदिराबाहेर गोमांस फेकण्याच्या घटनेवरून वातावरण चांगलेच तापले होते. या घटनेविरोधात काही संघटनांनी मोर्चाही काढला. त्यानंतर बिघडलेली कायदा सुव्यवस्था अबाधित राखण्यासाठी पोलिसांनी अश्रूधुराच्या नळकांड्या फोडल्या होत्या.