DGCA on Air India: अहमदाबादमध्ये झालेल्या विमान अपघानंतर एअर इंडिया विमान कंपनीला मोठा फटका बसताना दिसत आहे. या अपघातानंतर एअर इंडियांच्या विमानांबद्दल आणि उड्डाणांबद्दल अनेक तक्रारी येत आहेत. अशातच नागरी विमान वाहतूक महासंचालनालयाने एअर इंडियाला एक गंभीर इशारा दिला आहे. जर कंपनीच्या उड्डाण प्रक्रियेमध्ये अनियमितता सुरू राहिली तर एअरलाइनचा परवाना निलंबित केला जाऊ शकतो किंवा तो रद्दही केला जाऊ शकतो. पायलट ड्युटी शेड्यूलिंग आणि देखरेखीमध्ये सतत गंभीर चूका आढळत असल्याने डीजीसीएकडून हे पाऊल उचलण्यात आले आहे.
एअर इंडियाविरोधात सध्या नागरी उड्डयन महासंचालनालयाने कठोर निर्णय घेण्यास सुरुवात केली आहे. एअर इंडियावर वैमानिकांच्या फ्लाइट ड्यूटी टाइम लिमिटेशन (एफडीटीएल) नियमांचे उल्लंघन केल्याचा आरोप झाल्यानंतर कडक कारवाई करण्यात आली. डीजीसीएने कएअरलाइनच्या तीन वरिष्ठ अधिकाऱ्यांना त्यांच्या पदावरून काढून टाकण्याचे आदेशही दिले. यामध्ये विभागीय उपाध्यक्ष चुडा सिंग, क्रू शेड्युलिंग करणाऱ्या मुख्य व्यवस्थापक पिंकी मित्तल आणि क्रू शेड्युलिंगच्या नियोजनात सहभागी असलेल्या पायल अरोरा यांचा समावेश होता.
मे महिन्यात एअर इंडियाच्या बंगळुरू-लंडनच्या दोन विमानांबद्दल तक्रारी आल्यानंतर कंपनीसाठी कठीण काळ सुरू झाला. या विमानांनी वैमानिकांच्या निर्धारित मर्यादेपेक्षा जास्त वेळ घेतला जे फ्लाइट ड्युटी टाईम लिमिटेशनच्या नियमांचे स्पष्ट उल्लंघन होते. डीजीसीएने हे प्रकरण गांभीर्याने घेतले आणि एअरलाइनच्य व्यवस्थापकाला कारणे दाखवा नोटीस पाठवली आणि सात दिवसांत उत्तर मागितले. तपासात क्रू शेड्युलिंगमध्ये मोठा निष्काळजीपणा झाल्याचे समोर आलं.
डीजीसीएच्या कडक कारवाईचे आणखी एक प्रमुख कारण म्हणजे अहमदाबाद येथे झालेला अपघात. त्या दिवशी एअर इंडियाचे बोईंग ७८७-८ ड्रीमलाइनर विमान अहमदाबादहून लंडनला जात असताना टेकऑफनंतर कोसळले. या अपघातात २४१ प्रवासी आणि क्रू मेंबर्ससह २७० हून अधिक लोकांचा मृत्यू झाला. या घटनेने एअर इंडियाच्या सुरक्षा पद्धतींवर गंभीर प्रश्नचिन्ह उपस्थित केले. त्यानंतर डीजीसीएने एअरलाइनच्या प्रत्येक पैलूची बारकाईने चौकशी सुरू केली. २० जून रोजी कारणे दाखवा नोटीस बजावल्यानंतर दुसऱ्याच दिवशी डीजीसीएने २०२४ पासून आतापर्यंतच्या सर्व तपासांचे रेकॉर्ड मागितले.
डीजीसीएने एअर इंडियाच्या जुन्या अनियमिततांची चौकशी केल्यानंतर त्यांच्या अडचणी आणखी वाढल्या आहेत. फेब्रुवारी २०२५ मध्ये, एअर इंडियाच्या अंतर्गत ऑडिटमध्ये क्रू शेड्यूलिंगमध्ये अनेक त्रुटी आढळून आल्या. याबाबत कळवूनही कोणतीही सुधारणा करण्यात आली नाही. चुकीच्या क्रू पेअरिंग, वैमानिकांना विश्रांती न देणे आणि परवाना नियमांकडे दुर्लक्ष करणे यासारख्या चूका समोर आल्या. डीजीसीएने याला सिस्टमिक फेल्युअर म्हणतकठोर कारवाईचा इशारा दिला आहे.
दरम्यान, एअर इंडियाने या अधिकाऱ्यांना क्रू शेड्युलिंग आणि रोस्टरिंगशी संबंधित सर्व जबाबदाऱ्यांमधून तात्काळ काढून टाकण्यास सांगितले. तसेच या अधिकाऱ्यांवर तात्काळ कारवाई सुरू करावी आणि १० दिवसांच्या आत डीजीसीएला अहवाल द्यावा. प्रक्रिया पूर्ण होईपर्यंत या अधिकाऱ्यांची नॉन-ऑपरेशनल पोस्टवर बदली करावी आणि त्यांना क्रू शेड्युलिंग संबंधित कोणत्याही पदावर काम करण्याची परवानगी देऊ नये, असं डीजसीएने सांगितलं आहे.