नवी दिल्ली - राजधानी दिल्लीत अंगावर थरकाप उडवणारी घटना घडली. साहिल नावाच्या मुलाने १६ वर्षीय मुलीची चाकू भोसकून आणि दगडाने ठेचून हत्या केली. या हत्येचे संपूर्ण देशात पडसाद उमटत आहेत. या घटनेवरुन देशात संतापाची लाट उसळली आहे. व्हिडिओ व्हायरल झाल्यानंतर पोलीस प्रशासनाने गंभीर दखल घेत आरोपीला बुलंदशहरातून अटकही केली असून पुढील न्यायालयीन प्रक्रिया सुरू आहे. आता, या घटनेची केंद्र आणि राज्य सरकारनेही दखल घेतली आहे. पंतप्रधानांनी आदेश दिल्यानंतर खासदार हंस राज हंस यांनी पीडित कुटुंबीयांची भेट घेतली. तर, दिल्ली सरकारनेही आर्थिक मदत केली आहे.
सोशल मीडियातून घटनेचा व्हिडिओ व्हायरल होत असून आरोपीला फाशीच्या शिक्षा देण्याची मागणी करण्यात येत आहे. येथील खासदार हंसराज हंस यांनी पीडित कुटुंबाची घरी जाऊन भेट घेत सांत्वन केलं. पंतप्रधान आणि केंद्रीय गृहमंत्र्यांनी मला आदेश दिले होते, असे म्हणत हंस यांनी पीडित कुटुंबास धीर देण्यासाठी आपण इथे आल्याचे सांगितले. तसेच, आर्थिक मदतही केली. आता, दिल्ली सरकारनेही पीडित कुटुंबास आर्थिक मदत जाहीर केली आहे.
दिल्लीचे मुख्यमंत्री अरविंद केजरीवाल यांनीही साक्षी हत्याकांडाची गंभीर दखल घेतली आहे. दिल्ली सरकार कोर्टातून दोषी ठरल्यानंतर दोषीला कडक शिक्षा देण्याचा पूर्ण प्रयत्न करेल, त्यासाठी सरकारच्यावतीने मोठ्यात-मोठा वकील देणार असल्याचंही मुख्यमंत्री केजरीवाल यांनी म्हटलंय. तसेच, पीडित कुटुंबास १० लाख रुपयांची आर्थिक मदत करण्यात येईल, अशी माहितीही केजरीवाल यांनी ट्विटरवरुन दिली. दरम्यान, आम आदमी पक्षाच्या नेत्या अतिशी आज पीडित कुटुंबीयांची भेट घेणार आहेत. या कठिण काळात आम्ही सर्वजण आपल्यासमेवत आहोत, असे म्हणत अतिशी यांनी पीडित कुटुंबाला धीर दिला.
खासदार हंस यांनीही घेतली भेट
आम्ही राजकारणापलिकडे मुलीचे वडिलही आहोत, मुली आम्हालाही आहेत. जेव्हा व्हिडिओ पाहिला, ज्याला काळीज आहे, ज्याला स्वत:ची मुलगी आहे, म्हणूनच पंतप्रधानही स्वत: भावूक झाले, ते मुलींच्याबाबतीत अशी बातमीही ऐकू शकत नाहीत. त्यांनी आदेश दिला, गृहमंत्र्यांनीही आदेश दिला, आमचे राज्यातील प्रभारी कालपासून झोपले नाहीत, मग आपण कुटुंबीयांच्या भेटीसाठी आलो आहोत, अशा रितीने वरिष्ठ पातळीवर या घटनेची गंभीर दखल घेतल्याची माहिती खासदार हंसराज हंस यांनी दिली. तसेच, आरोपीला लवकरात लवकर फाशीची शिक्षा व्हावी, अशी मागणीही अहिर यांनी केली.