होशियारपूर - पंजाबच्या होशियारपूरमध्ये एक धक्कादायक घटना समोर आली आहे. एका 18 वर्षीय तरुणीने प्रियकराने प्रेमात धोका दिला म्हणून इन्स्टाग्रामवर लाईव्ह आत्महत्या केल्याची घटना घडली आहे.
पोलिसांनी दिलेल्या माहितीनुसार, तरुणीने इन्स्टाग्रामवर केलेल्या लाईव्ह आत्महत्येच्या व्हिडीओमध्ये प्रियकराने तिला धोका दिल्याचं म्हटलं आहे. तसेच त्यामुळेच आत्महत्येसारखा टोकाचा निर्णय घेतल्याचही सांगितलं. तरुणी होशियारपूरमध्ये एका भाड्याच्या घरात राहते. मुलीच्या आईचं चार वर्षापूर्वी निधन झालं असून तिचे वडील कामानिमित्त फ्रान्समध्ये राहतात.
तरुणीने आत्महत्येपूर्वी लिहिलेल्या एका सुसाईड नोटमध्ये तिच्या आत्महत्येसाठी तिचा प्रियकर इंदरला जबाबदार धरलं आहे. तरुणीच्या शेजाऱ्यांनी पोलिसांना या घटनेची माहिती दिली. पोलिसांना घटनास्थळी एका कॅमेऱ्यासमोर तरुणी गळफास घेतलेल्या अवस्थेत दिसली. तसेच तिने इन्स्टाग्रामवर लाईव्ह आत्महत्या केल्याचं ही समोर आलं. पोलीस याप्रकरणाचा अधिक तपास करत आहेत.