इंजिनिअरच्या घरात सापडले कोट्यवधी रुपये, पैसे मोजण्यासाठी मागवावी लागली मशीन

लोकायुक्त पोलिसांनी बेहिशोबी मालमत्ता प्रकरणात एका इंजिनिअरच्या घरावर धाड टाकली. घराची झाडाझडती घेतल्यानंतर पोलिसांच्या हाती इतके पैसे लागले की ते मोजण्यासाठी मशीन मागवावे लागले. 

बेडवर नोटांचे बंडल पडलेले आहेत. अधिकारी बसलेले आहेत आणि पैसे मोजत आहेत. एखाद्या सिनेमातील दृश्य वाटावे असा हा व्हिडीओ कर्नाटकातील आहे. लोकायुक्त पोलिसांनी बेहिशोबी मालमत्ता प्रकरणात एका सरकारी अधिकाऱ्याच्या घरावर धाड टाकली. तेव्हा तब्बल दोन कोटी रुपयांची संपत्ती मिळाली. यात एक कोटी ७ हजार रुपये रोख मिळाले आहेत. 

कर्नाटक लोकायुक्त पोलिसांनी बंगळुरूमध्ये ही कारवाई केली. एका शासकीय अधिकाऱ्याच्या घरी धाड टाकून पोलिसांनी दोन कोटींची मालमत्ता जप्त केली. 

कर्नाटक निवासी शैक्षणिक संस्था सोसायटीतील अधीक्षक अभियंता असलेल्या एच.एम. जनार्दन यांच्याशी संबंधित सहा ठिकाणी ही छापेमारी करण्यात आली. जनार्दन यांच्या जवळचा मित्र सुजय शेट्टी याच्या घरात १.७ कोटी रुपये रोख रक्कम मिळाली. 

व्हिडीओमध्ये दिसत आहे की, बेडवर बसून पोलीस अधिकारी आणि कर्मचारी पैसे मोजत आहे. त्यासाठी मशीनही आणण्यात आले होते.  

 पोलिसांनी काही महत्त्वाची कागदपत्रेही या धाडीत जप्त केली आहेत. इंजिनअर जनार्दन यांच्याकडे ४.४२ कोटी रुपयांची संपत्ती आढळून आली. यात २.४ कोटी रुपये किंमत असलेले तीन बंगले आहेत. त्याचबरोबर ६० लाख रुपये किंमत असलेली शेतीही आहे. 

एका अधिकाऱ्याने सांगितले की,  अधीक्षक अभियंता असलेल्या जनार्दन यांच्याकडे ४.४२ कोटी रुपयांची संपत्ती असल्याचे तपास आढळून आले आहे. ही संपत्ती त्यांच्या उत्पन्नांच्या तुलनेत २१६ टक्के जास्त आहे. झाडाझडती आणि तपास अभियान अजूनही सुरू आहे. यातून अधिक संपत्तीची माहिती मिळण्याचीही शक्यता आहे.