पश्चिम बंगालमधील पूर्व वर्धमान जिल्ह्यात नात्यांना कलंक लावणारी एक घटना घडली आहे. येथे एका महिलेची अत्यंत क्रूरपणे हत्या करण्यात आली आहे. ही हत्या तिच्या पतीनेच केल्याचा आरोप होत आहे. हत्येच्या घटनेनंतर तो फरार झाला आहे. धक्कादायक बाब म्हणजे या हैवानाला त्याची पत्नी आणि मुलग्यामध्ये अनैतिक संबंध असल्याचा संशय होता. या प्रकरणी आरोपीच्या मुलीने त्याच्याविरोधात तक्रार दिली आहे.
बंगालमधील कालना तालपुकूर येथे मदन बाग हा इसम त्याची पत्नी ठाकुरानी बाग, दोन मुली आणि एका मुलासह राहतो. या महिलेच्या भावाने सांगितले की, मदन बऱ्याच दिवसांपासून स्वत:ची पत्नी आणि मुलामध्ये अनैतिक संबंध असल्याचा संशय घेत होता. त्यामुळे हा मुलगा मामाकडे राहतो. तो मालदा येथील एका हॉटेलमध्ये काम करतो. तसेच नुकताच तो घरी आला होता.
मयत महिलेच्या भावाने पुढे सांगितले की, माझ्या बहिणीने तिच्या मुलाला पाहणयाची इच्छा व्यक्त केली होती. त्यावरूनच तिचं आणि तिच्या पतीचं भांडण झालं. त्यानंतर डोक्यात संशयाचा सैतान शिरलेल्या पतीने पत्नीची धारदार हत्याराने सपासप वार करून हत्या केली आणि फरार झाला. त्यानंतर सकाळी दोन्ही मुलींना आई खोलीतून बाहेर आलेली दिसली नाही. त्यामुळे छोटी मुलगी धावत तिच्याजवळ आली. तिने अंथरुणावर आईला रक्ताच्या थारोळ्यात पडलेले पाहिले.
त्यानंतर नातेवाईक आणि शेजारच्या लोकांना माहिती देण्यात आली. या घटनेमुले परिसरात खळबळ उडाली आहे. माहिती मिळताच पोलिसांनी घटनास्थळी येत मृतदेह पोस्टमार्टेमसाठी मेडिकल कॉलेजमध्ये पाठवला. या प्रकरणी महिलेच्या धाकट्या मुलीने पोलीस ठाण्यात तक्रार दिली आहे. पोलीस आरोपीचा शोध घेत आहेत.