बिहारमध्ये एखा व्यक्तीने तिच्या विवाहित प्रेयसीला घरातून पळवल्यानंतक तिची हत्या केल्याची धक्कादायक घटना घडली आहे. ही घटना समस्तीपूर जिल्ह्यात घडली आहे. समस्तीपूर जिल्ह्यातील दलसिंहसरायमधील चांदचौर गावात हा धक्कादायक प्रकार घडला. एक-दोन दिवसांपासून बेपत्ता असलेल्या तरुणीचा मृतदेह सापडला. ही बातमी वाऱ्यासारखी पसरली आणि घटनास्थळी गर्दी जमली.
सुरुवातीला मृतदेहाची ओळख पटली नव्हती. त्यानंतर उजियारपूर ठाण्यातील पोलीस घटनास्थळी पोहोचले. त्यांनी तपास सुरू करत मृतदेहाचे फोटो आजूबाजूच्या परिसरात पाठवले. त्यानंतर मृतदेहाची ओळख पटली. मृत महिला ही बेलामेघ गावातील रहिवासी असलेले अजय पासवान यांची पत्नी उजाला असल्याचे निष्पन्न झाले.
मृत महिलेचा पती अजय पासवान याने सांगितले की, तीन महिन्यांपूर्वीच त्यांचा विवाह झाला होता. दरम्यान, गावातीलच नितीश कुमार याच्याशी तिचं प्रेमप्रकरण सुरू झालं होतं. गेल्या सोमवारी नितीश तिला घरातून पळवून घेऊन गेला होता. ही बाबत या महिलेच्या पतीला समजल्यावर तो नितीशच्या घरी गेला. त्याने पत्नीला परत करण्यासाठी विनंती केली. मात्र नितीशने त्याचं ऐकलं नाही. तसेच त्याला धमकी दिली. त्यानंतर या महिलेचा पती अजय हा परत फिरला. त्यानंतर नितीशने आपल्या मोबाईलवरून त्याचं आणि त्याच्या पत्नीचं बोलणं करवलं. तसेच त्याला दलसिंहसराय येथे येण्यास सांगितले. रात्री ९ च्या सुमारास बोलणं झालं आणि सकाळी उजाला हिचा मृतदेह सापडला.
या घटनेनंतर सर्वांनाच धक्का बसला आहे. कारण नितीश कुमार हा उजालावर प्रेम करत होता. तसेच तिचं लग्न झाल्यानंतरही तिला घरातून पळवून घेऊन गेला होता. त्यामुळे एक प्रियकर खुनी कसा बनला, असा प्रश्न उपस्थित केला जात आहे.