आग्रा : उत्तर प्रदेशातील गावांमध्ये कोरोनामुळे हाहाकार माजला आहे. येथील आग्रामधील दोन गावांमध्ये गेल्या 20 दिवसांत 64 लोकांचा मृत्यू झाला आहे. या सर्वांना आधी ताप आला, नंतर श्वास घेण्यात त्रास झाला आणि त्यानंतर त्यांचा मृत्यू झाल्याचे समोर आले. दोन गावांमधील 64 लोकांच्या मृत्यूनंतर येथील आरोग्य विभागाची झोप उडाली आहे. या गांवामधील 100 जणांची कोरोना टेस्ट करण्यात आली, त्यामध्ये 27 जणांचा रिपोर्ट पॉझिटिव्ह आला आहे. (CoronaVirus : Death of 64 people with symptoms of corona in two villages in Agra)
आग्रापासून जवळपास 40 कि.मी. अंतरावर एत्मादपूरचे गाव कुरगवान आहे. येथे गेल्या 20 दिवसांत 14 लोकांचा मृत्यू झाला. गावातील लोकांच्या म्हणण्यानुसार, खोकला-सर्दी-ताप आणि श्वास घेण्यास त्रास झाल्यामुळे लोकांचा मृत्यू झाला आहे. अलीकडेच या गावातील लोकांची कोरोना टेस्ट करण्यात आली. त्यावेळी जवळपास 100 नमुने घेण्यात आले असून त्यामध्ये 27 जण कोरोना पॉझिटिव्ह असल्याचे आढळले.
ज्या लोकांचे रिपोर्ट पॉझिटिव्ह आले आहेत, त्यांना कुरगवानमधील प्राथमिक शाळेतील आयसोलेशन सेंटरमध्ये ठेवण्यात आले आहे. या आयसोलेशन सेंटरमध्ये कोणत्याही सुविधा नाहीत. यामुळेच आयसोलेशन सेंटरमधील 65 वर्षांच्या वृद्धांची प्रकृती अधिकच गंभीर झाली आहे. त्यामुळे वृद्धांना आता आग्रा रुग्णालयात हलविण्यात आले आहे.
(धक्कादायक! कोरोना रिपोर्ट पॉझिटिव्ह आल्यानंतर अवघ्या काही तासांत डॉक्टरचा मृत्यू!)
दुसरीकडे, गावातील लोकांमध्ये कोणतीही जागरूकता नाही. ज्या लोकांचा रिपोर्ट पॉझिटिव्ह आला आहे, ते भीतीपोटी शहरातील रुग्णालयात जायला तयार नाहीत. काही ग्रामस्थांनी सांगितले की ज्यांचा कोरोना रिपोर्ट पॉझिटिव्ह आला आहे, ते देखील गावात फिरत असतात, तसेच आयसोलेशन सेंटरमध्ये हे लोक एका ठिकाणी बसत नाहीत.
याचबरोबर, आग्रामधील आणखी एका गावात कोरोनाचा मोठा प्रादुर्भाव झाला आहे. बामरौली कटारा असे या गावचे नाव आहे. सुमारे 40 हजार लोकसंख्या असलेल्या या गावाचे सरपंच म्हणाले, आतापर्यंत येथे 50 लोकांचा मृत्यू झाला आहे. लोकांचे आरोग्य बिघडते, नंतर त्यांना श्वास घेण्यास अडचण येते आणि थोड्या वेळातच त्यांचा मृत्यू होतो, असे गावाचे सरपंच म्हणाले.
(Corona Vaccine: खासगी रुग्णालयांमध्ये सर्वात महाग मिळतेय कोरोनाची लस, जाणून घ्या किंमत...)
सतत विनवणी केल्यावर याठिकाणी आरोग्य विभागाची टीम पोहोचली आणि 46 जणांची कोरोना टेस्ट केली, त्यामध्ये दोन लोकांचा रिपोर्ट कोरोना पॉझिटिव्ह आला आहे. गावातील लोकसंख्या जास्त असल्यामुळे अद्याप पूर्णपणे कोरोना टेस्टिंग झाली नाही. दरम्यान, या गावातील लोक अजूनही खूप बेफिकीर आहेत. मास्क आणि सोशल डिस्टसिंगचे पालन केले जात नाही.
बमरौली कटारा गावातील सार्वजनिक आरोग्य केंद्राला कुलूप लावण्यात आला आहे. गेल्या पाच वर्षांपूर्वी हे सार्वजनिक आरोग्य केंद्र तयार करण्यात आले होते. याठिकाणी नर्स आणि फार्मासिस्ट येते होते, मात्र आता याठिकाणी कोणीही येत नाही, असे येथील गावकऱ्यांनी सांगितले.