स्वामी विवेकानंद यांच्या गुरूच्या नावावरून वाद, ममता बॅनर्जी यांनी पंतप्रधान मोदींवर साधला निशाणा

पंतप्रधानांनी बंगाली महापुरुषांसंदर्भात सांस्कृतिक असंवेदनशीलता दर्शवल्याचा आरोप टीएमसीने केला आहे...

स्वामी विवेकानंद यांचे गुरू स्वामी रामकृष्ण परमहंस यांच्या नावावरून आता एक नवा वाद सुरू झाला आहे. त्यांच्या जयंतीनिमित्त पंतप्रधान नरेंद्र मोदी यांनी सोशल मीडिया प्लॅटफॉर्म 'X' वर एक पोस्ट केली. यात मोदी यांनी त्यांना 'स्वामी' म्हणून संबोधले आहे. यावरून आता तृणमूल काँग्रेसने (TMC) त्यांना लक्ष्य केले आहे. पंतप्रधानांनी बंगाली महापुरुषांसंदर्भात सांस्कृतिक असंवेदनशीलता दर्शवल्याचा आरोप टीएमसीने केला आहे.

यासंदर्भात भाष्य करताना टीएमसीने म्हटले आहे की, बंगालमध्ये रामकृष्ण परमहंस यांना 'स्वामी' नव्हे तर 'ठाकूर' म्हणून संबोधले जाते आणि त्यांची पूजा केली जाते. ममता बॅनर्जी पंतप्रधान मोदी यांच्या पोस्टवर प्रत्युत्तर देत म्हणाल्या, "पुन्हा एकदा, आपल्या पंतप्रधानांनी बंगालच्या महान व्यक्तींबद्दल त्यांची सांस्कृतिक असंवेदनशीलता उघडपणे दर्शवली आहे. आज युगावतार (आपल्या काळातील देव अवतार) श्री श्री रामकृष्ण परमहंसदेव यांची जयंती आहे. या प्रसंगी महान संताचा सन्मान करण्याचा प्रयत्न करताना, आपल्या पंतप्रधानांनी महान संताच्या नावापुढे 'स्वामी' हा अभूतपूर्व आणि अयोग्य उपसर्ग जोडला आहे."

सांस्कृतिक अस्मितेचे राजकारणयापूर्वीही पंतप्रधान नरेंद्र मोदी यांनी संसदेत बंकिमचंद्र चॅटर्जी यांचा उल्लेख 'बंकिम दा' केल्यावरून वाद झाला होता. आगामी निवडणुकांच्या पार्श्वभूमीवर, भाजपला 'बाहेरील पक्ष' ठरवण्यासाठी टीएमसी सातत्याने सांस्कृतिक अपमानाचे आरोप करत आहे.

भाजपचं प्रत्युत्तर -भाजप आमदार अग्निमित्रा पॉल यांनी तृणमूलच्या या आरोपांना चोख प्रत्युत्तर दिले आहे. "रामकृष्ण यांना स्वामी म्हणणे हा अपमान कसा असू शकतो का?" असा सवाल त्यांनी केला. तसेच मुख्यमंत्री ममता बॅनर्जी स्वतःच सरस्वती मंत्रांचा चूक उच्चार करतात. ही चूक आहे की जाणूनबुजून? असा सवालही त्यांनी केला. "एकीकडे जगातील दिग्गज AI परिषदेसाठी दिल्लीत येत आहेत आणि बंगालमध्ये तुम्ही केवळ नकारात्मकता पसरवण्यात आहात," अशी टीकाही पॉल यांनी यावेळी केली.