Rahul Gandhi Disqualification: “उसेन बोल्टही आश्चर्यचकीत होईल”; राहुल गांधींवरील कारवाईवरुन काँग्रेसचा मोदी सरकारला टोला

Rahul Gandhi Disqualification: कायद्याचा आधार घेऊन विरोधकांना गप्प करताय, हेच यातून सिद्ध होते, अशी टीका पी. चिदंबरम यांनी मोदी सरकार आणि भाजपवर केली.

Rahul Gandhi Disqualification:काँग्रेस नेते राहुल गांधी यांचे लोकसभा सदस्यत्व रद्द करण्यात आले. राहुल गांधींची खासदारकी रद्द झाल्यानंतर काँग्रेस आक्रमक झाली आहे. राहुल गांधींवरील कारवाईच्या निषेधार्थ देशभरात काँग्रेसकडून आंदोलन करण्यात येत आहे. केवळ काँग्रेस नाही तर राहुल गांधी यांच्या कारवाईविरोधात देशातील विरोधक केंद्रातील मोदी सरकार आणि भाजपवर टीका करताना पाहायला मिळत आहेत. यातच काँग्रेसचे ज्येष्ठ नेते आणि देशाचे माजी केंद्रीय अर्थमंत्री पी. चिदंबरम यांनी धावपटू उसेन बोल्टचा दाखला देत भाजपवर निशाणा साधला. 

मोदी आडनावाबाबत केलेल्या वक्तव्यासंदर्भात सुरत न्यायालयाने राहुल गांधी यांना दोषी ठरवत दोन वर्षांची शिक्षा सुनावली होती. त्यानंतर दुसऱ्याच दिवशी राहुल गांधी यांचे संसद सदस्यत्व रद्द करण्यात आले. अशात राहुल गांधी यांना दिल्लीतील त्यांचे निवास रिकामे करण्याची नोटीस लोकसभेच्या हाऊसिंग कमिटीकडून देण्यात आली. यावरून काँग्रेस पुन्हा एकदा आक्रमक झाली असून, ठाकरे गटाचे खासदार संजय राऊत यांनीही ही बाब निषेधार्ह असल्याचे म्हटले आहे. 

उसेन बोल्टही आश्चर्यचकीत होईल

पी. चिदंबरम म्हणाले की, न्यायालयाने शिक्षा सुनावल्यानंतर ज्या वेगाने मोदी सरकारने राहुल गांधी यांच्याविरोधात अपात्रतेची कारवाई केली, ती पाहता उसेन बोल्टही आश्चर्यचकीत होईल. अशा प्रकारच्या प्रकरणांमध्ये आतापर्यंत सुनावण्यात आलेली ही सर्वांत मोठी आणि कठोर शिक्षा आहे. मानहानीच्या खटल्यात आतापर्यंत दोन वर्षांची शिक्षा कधी झाली, याबाबत पियुष गोयल किंवा केंद्रातील मोदी सरकाने समजवून सांगावे. कायद्याचा आधार घेऊन तुम्ही विरोधकांना गप्प करताय, हेच यातून दिसत आहे, या शब्दांत पी. चिदंबरम यांनी जोरदार हल्लाबोल केला. 

दरम्यान, काँग्रेसचे ज्येष्ठ नेते शशी थरूर यांनी यावर प्रतिक्रिया देताना, मानहानीच्या खटल्यात राहुल गांधींना दोन वर्षांची झालेली शिक्षा हा आशेचा किरण आहे. त्यामुळे विरोधी पक्षांची अभूतपूर्व एकजूट झाली आहे. आम्ही प्रादेशिक पक्षांना प्रत्येक राज्यात काँग्रेसचा एक प्रतिस्पर्धी मानत आलो. मात्र, या परिस्थितीत ते सर्व पक्ष आमच्या बाजूने आहेत. दिल्लीत अरविंद केजरीवाल, पश्चिम बंगालमध्ये ममता बॅनर्जी, तेलंगणमध्ये के. चंद्रशेखर राव यापूर्वी कधीही काँग्रेससोबत नव्हते, मात्र आता ते आमच्यासोबत आहेत. विरोधकांची ही एकजूट भाजपविरोधात आतापर्यंतची सर्वांत मोठी शक्ती म्हणून समोर आली आहे. हा भाजपच्या कृतीचा निषेध आहे, असे शशी थरुर यांनी सांगितले.

सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"