नवी दिल्ली : सुधारित नागरिकत्व कायद्यासंबंधी अपप्रचाराने लोकांना भडकावून काँग्रेसवाले दिल्लीतील शांतता बिघडवत असल्याचा आरोप करत याबद्दल दिल्लीवासीयांनी काँग्रेसला धडा शिकवावा, असे आवाहन केंद्रीय गृहमंत्री अमित शहा यांनी गुरुवारी केले.
दिल्ली विकास प्राधिकरणाने (डीडीए) आयोजित केलेल्या एका कार्यक्रमात बोलताना नागरिकत्व कायद्याच्या विरोधात दिल्लीत झालेल्या हिंसक आंदोलनाचे खापर विरोधी पक्षांवर आणि खासकरून काँग्रेस पक्षावर फोडले. शहा म्हणाले की, दिल्लीत अशांतता निर्माण करण्यास काँग्रेस पक्षाच्या नेतृत्वातील ‘तुकडे तुकडे गँग’ जबाबदार आहे. याबद्दल त्यांना धडा शिकविण्याची वेळ आली आहे. दिल्लीच्या जनतेने (आगामी विधानसभा निवडणुकीत) हे काम नक्की करावे. आता लोकांना हिंसाचार करायला लावणारे, संसदेत सुधारित नागरिकत्व कायद्यावर चर्चा झाली तेव्हा काहीही बोलले नाहीत. मात्र, बाहेर जाऊन त्यांनी लगेच लोकांची दिशाभूल करायला सुरुवात केली.