चंदीगड - भाजपाचे वर्चस्व असलेल्या चंदीगड महानगरपालिकेच्या निवडणुकीचा धक्कादायक निकाल लागला आहे. आज सुरू असलेल्या चंदीगड महानगरपालिका निवडणुकीच्या मतमोजणीमध्ये आम आदमी पक्ष जोरदार मुसंडी मारताना दिसत आहे. मतमोजणीच्या सुरुवातीच्या कलांमध्ये आपनेभाजपाला जोराचा धक्का दिला आहे. पालिकेतील वॉर्ड क्र. १७ मध्ये आम आदमी पक्षाच्या दमनप्रीत यांनी महापौर रविकांत यांना ८२८ मतांनी पराभूत केले. दरम्यान, आतापर्यंत समोर आलेल्या निकालांमध्ये आपच्या उमेदवारांनी भाजपाच्या अनेक विद्यमान नगरसेवकांचा पराभव केला आहे.
आतापर्यंत २६ जागांचे कल हाती आले आहेत. यामध्ये आप ११, काँग्रेस ६, भाजपा ८ आणि अकाली दल एका जागेवर आघाडीवर आहे. यावेळच्या निकालांनी सर्वच राजकीय पंडितांना धक्का दिला आहे. आतापर्यंतच्या कलांमध्ये आम आदमी पक्षाने काँग्रेस आणि भाजपाला जोरदार टक्कर दिली आहे.
चंदीगड महानगरपालिका निवडणुकीसाठी शुक्रवारी ६० टक्के मतदान झाले होते. येथील प्रभागांची संख्या २०१६ मध्ये २६ होती. तर आता ही संख्या वाढून ३५ करण्यात आली आहे. येथील निवडणुकीमध्ये काँग्रेस आणि आपमध्ये मुख्य लढत असते. मात्र आता आम आदमी पक्षही मैदानात उतरल्याने लढत तिरंगी झाली आहे.