नवी दिल्ली: महाराष्ट्राचे मुख्यमंत्री उद्धव ठाकरे यांनी पंतप्रधान नरेंद्र मोदी यांची भेट घेतली. यावेळी त्यांच्यासोबत शिवसेनेचे नेते आणि मंत्री आदित्य ठाकरे सुद्धा उपस्थित होते. पंतधान नरेंद्र मोदींच्या भेटीनंतर उद्धव ठाकरे यांनी पत्रकार परिषद घेतली.
यावेळी पंतप्रधान नरेंद्र मोदी यांच्यासोबत राज्याशी संबंधित अनेक विषयावर चर्चा झाल्याचे उद्धव ठाकरे यांनी सांगितले. तसेच, नरेंद्र मोदींनी राज्यातील चांगल्या गोष्टी असतील, त्यामध्ये केंद्राचे सहकार्य असेल, असे आश्वासन दिल्याचे उद्धव ठाकरे यांनी सांगितले. याशिवाय, सीएए, एनसीआर याबाबतही नरेंद्र मोदी यांच्यासोबत चर्चा झाल्याचे उद्धव ठाकरे यांनी सांगितले. सीएएवरून कोणाला घाबरण्याची गरज नाही. एनसीआर फक्त आसाम पुरते मर्यादित असून संपूर्ण देशात लागू होणार नाही, असे सांगत उद्धव ठाकरे यांनी एकप्रकारे सीएएला समर्थन दिल्याचे समजते.
याशिवाय, राज्यातील जीएसटी, शेतकऱ्यांच्या मुद्दयांवरही चर्चा झाल्याचे सांगितले. जीएसटीचा पैसा येत आहे, मात्र ज्या वेगात यायला हवा त्या वेगात येत नाही. शेतकरी विम्याबाबतही चर्चा केली. जीएसटीचे पैसे येत आहेत. मध्ये मी पत्र लिहिले तेव्हा काही पैसे आले आहेत, मात्र हे पैसे येण्याचा वेग वाढायला हवा. आम्ही शेतकऱ्यांसाठी योजना आणत आहोत. त्यासाठी पैसा लागणार आहे, असे उद्धव ठाकरे म्हणाले.
दरम्यान, मुख्यमंत्री झाल्यानंतर उद्धव ठाकरे यांचा हा पहिलाच दिल्ली दौरा आहे. नरेंद्र मोदींच्या भेटीनंतर उद्धव ठाकरे केंद्रीय गृहमंत्री अमित शाह, भाजपाचे नेते लालकृष्ण अडवाणी आणि काँग्रेसच्या अध्यक्षा सोनिया गांधी यांचीही भेट घेणार आहेत. उद्धव ठाकरे आणि सोनिया गांधी यांची ही पहिलीच भेट असणार आहे.
राज्यात महाविकास आघाडीचे सरकार स्थापन झाल्यानंतर आदित्य ठाकरे दिल्लीत जाऊन सोनिया गांधी यांना शपथविधी सोहळ्याचे निमंत्रण दिले होते. दरम्यान, उद्धव ठाकरे यांच्या भेटीगाठी औपचारिक असल्याचे सांगण्यात येत असले तरी सोनिया गांधी यांच्या भेटीत शिवसेनेला संपुआत घेण्यावर चर्चा होऊ शकते.