शोले या चित्रपटात वीरूचं पात्र साकारणाऱ्या धर्मेंद्रने पाण्याच्या टाकीवर चढून घातलेल्या गोंधळाचा सिन सुपरहिट झाला होता. आता पाण्याच्या टाकीवर चढून अनेक आंदोलनं होतात, तसेच काही जण विनाकारण लक्ष वेधून घेत असतात. मात्र राजस्थानमधील श्रीगंगानगर जिल्ह्यातील नेतेवाला येथे एका पाण्याच्या टाकीवर चक्क बैल चढल्याने एकच गोंधळ उडाला. हा प्रकार पाहण्यासाठी पाण्याच्या टाकीजवळ बघ्यांची भरपूर गर्दी जमली. शेवटी याची माहिती प्रशासनाला देण्यात आली.
काही वेळातच पोलिसांसह एसडीएम रणजीत, तहसीलदार विक्रम हे घटनास्थळी दाखल झाले. पाण्याच्या टाकीवर चढलेल्या बैलाला खाली उतरवण्यासाठी एक हायड्रो पोकलेन मशीन बोलावण्यात आली. या मशीनच्या मदतीने या बैलाला खाली उतरण्याचे प्रयत्न सुरू करण्यात आले. अखेरीस सहा तासांनंतर या बैलाला खाली उतरवण्यात यश आले.
हा बैल पाण्याच्या टाकीवर खूप उंचावर पोहोचल्याने त्याला उतरवण्यासाठी खूप काळजी घ्यावी लागली. कारण हा बैल बिथरून उधळला असता तर खाली पडून त्याचा मृत्यू होण्याची शक्यता होती. त्यामुळे आधी एका प्राण्यांच्या डॉक्टराला बोलावून बैलाला बेशुद्ध पडण्याचं इंजेक्शन देण्यात आले. मग पाण्याच्या टाकीवर जाऊन आधी या बैलाला दोरीने बांधण्यात आले. त्यानंतर मशिनीच्या मदतीने त्याला हळुहळू खाली उतरवण्यात आले. त्यानंतर प्रशासनाने सुटकेचा निश्वास टाकला.
दरम्यान, श्रीगंगानगरमध्ये याआधीही अशी घटना घडली होती. त्यावेळीही एक बैल पाण्याच्या टाकीवर चढला होता. तेव्हा हीच क्लुप्ती वापरून त्याला खाली उतरवण्यात आले होते.