लग्नाच्या दिवशी वधूचा अपघात, डॉक्टरांच्या साक्षीने हॉस्पिटलमध्येच नवरदेवाने बांधली लग्नगाठ  

केरळमध्ये अलीकडेच एक अनोखा विवाह सोहळा संपन्न झाला, जो मंडपात नाही तर चक्क इमर्जन्सी वॉर्डमध्ये आनंदाने पार पडला!

केरळमधील कोची शहरात एका खासगी रुग्णालयाच्या आपत्कालीन विभागात नुकताच एक अत्यंत भावनिक आणि अनोखा विवाह सोहळा पार पडला. लग्नाच्या काही तास आधी वधूचा गंभीर अपघात झाला असतानाही, नवरदेवाने आणि दोन्ही कुटुंबांनी सामंजस्याने शुभ मुहूर्ताची वेळ न दवडता हॉस्पिटललाच आपले वेडिंग व्हेन्यू (Wedding Venue) बनवले आणि प्रेम आणि निष्ठेची एक अनोखी कहाणी जगासमोर आणली. सदर वधू स्कूल टीचर असून, नवरदेव इंजिनियरिंग कॉलेजमध्ये प्रोफेसर आहे. 

वधूचा अपघात आणि कुटुंबाचा निर्णय

शुक्रवारी (२० नोव्हेंबर २०२५) दुपारी लग्नाचा मुहूर्त निश्चित झाला होता. मात्र, पहाटे सुमारे ३ वाजता वधू नातेवाईकांसह विवाह स्थानाकडे निघाले असता त्यांच्या कारचा अपघात झाला आणि कार एका झाडाला धडकली. चालकाचे नियंत्रण सुटल्याने हा अपघात झाला. जखमींना तात्काळ कोट्टायम मेडिकल कॉलेजमध्ये दाखल करण्यात आले. मात्र वधूच्या पाठीच्या कण्याला (Spine) गंभीर दुखापत झाली. अधिक उपचारांसाठी तिला सुमारे ७० किमी दूर असलेल्या कोचीच्या व्हीपीएस लेकशोर हॉस्पिटलमध्ये हलवण्यात आले. तिचा होणारा आणि त्याचे कुटुंब तत्काळ हॉस्पिटलमध्ये पोहोचले.

इमर्जन्सी विभागात लग्नसोहळा

हा दिवस वधूच्या आयुष्यातील खास दिवस होता आणि उपचार दिल्यामुळे तिची प्रकृती स्थिर झाली होती. ते पाहता नवरदेवाने डॉक्टरांसमोर त्याच दिवशीचा लग्न मुहूर्त साधण्याची इच्छा प्रकट केली. दोन्ही कुटुंबांनाही कल्पना आवडली. त्यांनी हॉस्पिटल प्रशासनाकडे त्याच दिवशी लग्न लावण्याची विनंती केली. डॉक्टरांशी चर्चा केल्यानंतर आणि रुग्णाची सोय लक्षात घेऊन, हॉस्पिटल प्रशासनाने मानवतावादी दृष्टिकोन ठेवून इमर्जन्सी विभागातच विवाहाची परवानगी दिली.

साधेपणाने साजरा झाला विवाहसोहळा:

या विवाह सोहळ्यात कोणतीही सजावट नव्हती, मोठा समारंभ नव्हता; डॉक्टर, आरोग्य कर्मचारी आणि कुटुंबातील जवळचे सदस्य हेच साक्षीदार होते.

वचनांची देवाणघेवाण:

पाठीच्या कण्याला दुखापत झाल्यामुळे वधू बेडवर होती. या कठीण काळातही दोघांनी आयुष्यभर एकमेकांना साथ देण्याचे वचन दिले. नवरदेवाने 'माझ्या आयुष्यातील या विशेष दिवशी माझा जोडीदार आनंदी असावा' या भावनेने हा निर्णय घेतला.

या घटनेतून हे स्पष्ट होते की, विवाह हा केवळ सोहळा नसून, विश्वास, निष्ठा आणि अडचणीतही साथ देण्याची प्रतिज्ञा आहे. सध्या वधूची प्रकृती स्थिर असून, डॉक्टरांनी तिच्यावर शस्त्रक्रिया करावी लागणार असल्याचे सांगितले आहे.