कूलर वर्क्सशॉपमधील खून प्रकरण

आरोपींची ओळख परेडच घेतली नव्हती

आ�

��ोपींची ओळख परेडच घेतली नव्हती

सर्व चारही आरोपी निर्दोष : कूलर वर्क्सशॉपमधील खून प्रकरण

नागपूर : पुराव्यांच्या दृष्टीने अत्यंत महत्त्वाची समजली जाणारी आरोपींची ओळख परेडच घेण्यात न आल्याने अजनी विश्वकर्मानगर येथील एका कूलर वर्क्सशॉपमध्ये झालेल्या खून व खुनाच्या प्रयत्नातील सर्वच चारही आरोपींची अतिरिक्त सत्र न्यायाधीश अशोक धामेचा यांच्या न्यायालयाने सबळ पुराव्याअभावी निर्दोष सुटका केली.
हजरत अली अब्दुल रज्जाक रा. बाभूळखेडा, रफिक शेख हावीसूल शेख रा. जोशीवाडी, सद्दाम शेख अशरफूल शेख रा. चंद्रमणीनगर आणि इब्राहिम शेख अजीज शेख रा. चंद्रपूर, अशी आरोपींची नावे आहेत. विवेक मसराम रा. ताजनगर, असे मृताचे आणि गणेश दिलीप गादरवार, असे जखमीचे नाव होते. अमित रुकदास नागपुरे रा. विश्वकर्मानगर हा या प्रकरणातील फिर्यादी होता. सरकार पक्षानुसार ही घटना विश्वकर्मानगर येथील मुख्तार शेख याच्या कूलर वर्कशॉपमध्ये २३ नोव्हेंबर २०१३ रोजी घडली होती.
घटनेच्या दिवशी अमित नागपुरे याच्या भावासोबत मुख्तार शेख याचे कूलर व्यवसायातील पैशाच्या घेण्यादेण्यातून भांडण झाले होते. या भांडणाचा जाब विचारण्यासाठी अमित नागपुरे हा आपले दोन मित्र विवेक मसराम आणि गणेश गादरवार याच्यासोबत मुख्तार शेख याच्या वर्कशॉपमध्ये गेला होता. पुन्हा भांडण उद्भवून मुख्तार शेख आणि त्याच्या कामगारांनी लोखंडी रॉड आणि दंड्यांनी तिघांवरही हल्ला केला होता. त्यात विवेक मसराम आणि गादरवार हे गंभीर जखमी झाले होते. सेंटर पॉईंट इस्पितळात उपचार घेताना दुसऱ्या दिवशी विवेकचा मृत्यू झाला होता. अजनी पोलिसांनी भादंविच्या ३०२, ३०७, १४१, १४३, १४४, १४७, १४९, ३४ कलमान्वये गुन्हा दाखल करून चार आरोपींना अटक केली होती. मुख्तार शेख हा आजही फरारच आहे. पोलीस निरीक्षक बी.पी. साळंुके यांनी तपास करून न्यायालयात आरोपींविरुद्ध आरोपपत्र दाखल केले होते. आठ साक्षीदार तपासण्यात आले. घटना, जप्ती आणि मृतदेहाचा कायद्यांतर्गत पंचनामा करण्यात आला नाही, आरोपींची ओळखपरेड घेण्यात आलेली नाही, असा बचाव पक्षाचा युक्तिवाद ग्राह्य धरून आरोपींची निर्दोष सुटका करण्यात आली. न्यायालयात आरोपींच्या वतीने ॲड. अब्दुल बशीर, ॲड. प्रफुल्ल मोहगावकर आणि ॲड. अमोल जलतारे यांनी काम पाहिले.