बीएमसीत भाजपची सरशी, पण चर्चा मात्र 'रसमलाई'ची; पी.सी.मोहनांचा राज ठाकरेंना डिवचणारा फोटो व्हायरल!

बीएमसीवर भाजपचे वर्चस्व निर्माण होताना दिसत असतानाच, आता या निवडणुकीत 'रसमलाई'ची एन्ट्री झाली आहे.

मुंबई महानगरपालिका निवडणुकीच्या निकालांचे चित्र स्पष्ट होताच आता राजकीय वर्तुळात कलगीतुरा रंगू लागला आहे. बीएमसीवर भाजपचे वर्चस्व निर्माण होताना दिसत असतानाच, आता या निवडणुकीत 'रसमलाई'ची एन्ट्री झाली आहे. भाजपचे बंगळुरू सेंट्रलचे खासदार पी.सी. मोहन यांनी सोशल मीडियावर रसमलाईचा फोटो शेअर करत महाराष्ट्र नवनिर्माण सेनेचे अध्यक्ष राज ठाकरे यांच्यावर जोरदार निशाणा साधला आहे. "काही रसमलाई मागवली आहे," असे म्हणत त्यांनी राज ठाकरेंना त्यांच्याच भाषेत प्रत्युत्तर दिले आहे.

नेमकं प्रकरण काय? 

बीएमसी निवडणुकीच्या प्रचारादरम्यान भाजपचे नेते आणि खासदार के. अन्नामलाई यांनी मुंबईबाबत एक विधान केले होते. "मुंबई हे शहर केवळ महाराष्ट्राचे राहिलेले नसून ते आता एक आंतरराष्ट्रीय शहर बनले आहे," असे अन्नामलाई म्हणाले होते. त्यांच्या या विधानानंतर मुंबईच्या राजकारणात मोठा गदारोळ माजला होता. राज ठाकरे यांनी अन्नामलाई यांच्यावर सडकून टीका केली होती.

राज ठाकरेंनी 'रसमलाई' असा केला होता उल्लेख 

शिवसेना (ठाकरे गट) आणि मनसेच्या एका संयुक्त रॅलीमध्ये बोलताना राज ठाकरे यांनी अन्नामलाई यांचा समाचार घेतला होता. अन्नामलाई यांच्या नावाचा उच्चार 'रसमलाई' असा करत राज ठाकरेंनी त्यांची खिल्ली उडवली होती. तसेच, "मुंबईवर भाष्य करण्याचा अधिकार त्यांना कोणी दिला?" असा सवालही विचारला होता. इतकेच नाही तर, राज ठाकरेंनी 'हटाओ लुंगी, बजाओ पुंगी' अशी जुनी घोषणा देत दक्षिण भारतीयांवरही निशाणा साधला होता.

अन्नामलाई यांचे खणखणीत प्रत्युत्तर 

राज ठाकरेंच्या या टीकेला अन्नामलाई यांनीही तितक्याच आक्रमकपणे उत्तर दिले होते. "काही लोक मला मुंबईत आल्यावर पाय कापण्याची धमकी देत आहेत. मी मुंबईत येणारच, कोणाला पाय कापायचे आहेत त्यांनी कापून दाखवावेत," असे आव्हान त्यांनी दिले होते. तसेच, मुंबईच्या विकासात मराठी माणसाचे योगदान अमूल्य असल्याचे मान्य करत, माझ्या विधानाचा चुकीचा अर्थ काढला गेल्याचेही त्यांनी स्पष्ट केले होते.

भाजप खासदाराचा पलटवार 

आता बीएमसी निवडणुकीत भाजप विजयाकडे वाटचाल करत असताना खासदार पी.सी. मोहन यांनी राज ठाकरेंनी वापरलेल्या 'रसमलाई' या शब्दाचाच वापर करून त्यांना टोला लगावला आहे. "काही रसमलाई ऑर्डर केली आहे," असे कॅप्शन देत त्यांनी मिठाईचे फोटो शेअर केले. ज्या शब्दाचा वापर करून राज ठाकरेंनी भाजप नेत्याची खिल्ली उडवली होती, आज त्याच शब्दाचा वापर करून भाजपने राज ठाकरेंना डिवचले आहे. यामुळे सोशल मीडियावर आता एकच चर्चा रंगली असून, निवडणुकीच्या निकालानंतर आता हा 'मिठाई वॉर' कुठपर्यंत जातो, हे पाहणे औत्सुक्याचे ठरेल.