पाटणा - बिहारमधील मुझफ्फरपूर येथील हिट अँड रन प्रकरणातील आरोपी भाजपा नेता मनोज बैठानं अखेर पोलिसांसमोर आत्मसमर्पण केले आहे. मनोज बैठानं मुझफ्फरपूर येथे आत्मसमर्पण केले आहे. मनोजवर 9 मुलांच्या मृत्यूस कारणीभूत ठरल्याचा आरोप आहे. 24 फेब्रुवारीला मनोज बैठानं मुझफ्फरपूर येथे मद्यधुंद अवस्थेत भरधाव कारनं 9 लहानग्यांना चिरडलं होतं. सीतामढी आणि मुझफ्फरपूरदरम्यान एनएच 77 वर हा भीषण अपघात झाला होता. यामध्ये 9 लहान मुलांचा जागीच मृत्यू झाला होता.
9 चिमुरड्यांना चिरडलं
शनिवारी (24 फेब्रुवारी) शाळा सुटल्यानंतर विद्यार्थी घरी जाण्याच्या तयारीत होते. यावेळी मनोज बैठाचं त्याच्या बोलेरो कारवरील नियंत्रण सुटल्याने कार थेट शाळेच्या आवारात घुसली. अनपेक्षितपणे भरधाव वेगाने येणा-या बोलेरोखाली 33 विद्यार्थी आले. यामधील गंभीर जखमी झालेल्या नऊ विद्यार्थ्यांचा मृत्यू झाला.
दरम्यान, या घटनेनंतर मनोज बैठा हा देश सोडून पळून जाण्याच्या तयारीत होता. भारत-नेपाळ सीमेनजिक तो कुठेतरी लपून बसल्याची माहितीदेखील समोर आली होती.