दे दणादण! नशेत असलेल्या नवरदेवाने नवरीला मारली लाथ; सासरच्या मंडळींसोबत हाणामारी

दारूच्या नशेत असलेल्या नवरदेवाने सर्व मर्यादा ओलांडल्या. नवरदेवाने भर मंडपात नवरीशी गैरवर्तन केलं आणि मध्यस्थी करण्यासाठी आलेल्या सासरच्या मंडळींशी हाणामारी केली.

उत्तर प्रदेशातील बाराबंकी जिल्ह्यातील रामनगर तहसील अंतर्गत येणाऱ्या गणेशपूर गावात शुक्रवारी रात्री एका लग्नसोहळ्यात तुफान राडा झाला. हार घालण्याच्या वेळी दारूच्या नशेत असलेल्या नवरदेवाने सर्व मर्यादा ओलांडल्या. नवरदेवाने भर मंडपात नवरीशी गैरवर्तन केलं आणि मध्यस्थी करण्यासाठी आलेल्या सासरच्या मंडळींशी हाणामारी केली. या घटनेमुळे लग्नाच्या आनंदावर विरजण पडलं आणि तिथे एकच खळबळ उडाली.

मिळालेल्या माहितीनुसार, बहराइच जिल्ह्यातील मुराइनपुरवा येथून ही वरात आली होती. वरातीचे स्वागत मोठ्या उत्साहात आणि रितीरिवाजाप्रमाणे करण्यात आलं. रात्री ११ च्या सुमारास नवरदेव विशाल स्टेजवर पोहोचला, पण तो नशेमुळे स्वतःवरचं नियंत्रण गमावून बसला होता. विधी सुरू असतानाच अचानक विशालने नवरी निशा हिला लाथ मारली, हे पाहून उपस्थित पाहुणे आणि वधूपक्ष संतापले.

जेव्हा मुलीचे वडील सत्रोहन यांनी आपल्या मुलीला वाचवण्याचा प्रयत्न केला, तेव्हा नवरदेवाने त्यांच्या अंगावर धावून जात त्यांना मारहाण करण्यास सुरुवात केली. हे पाहून वधू पक्षाच्या लोकांचा संयम सुटला आणि दोन्ही बाजूंकडून जोरदार हाणामारी सुरू झाली. लग्न मंडपाचं रूपांतर हाणामारीत झालं. रागाच्या भरात लोकांनी अनेक खुर्च्या तोडल्या आणि पाहुणे आपला जीव वाचवण्यासाठी इकडे-तिकडे धावू लागले. या हिंसक झटापटीत नवरदेवाची बहीण, मेहुणे आणि एक वऱ्हाडी गंभीर जखमी झाले आहेत.

घटनेची माहिती मिळताच महादेवा चौकी प्रभारी रवींद्र सिंह फौजफाट्यासह घटनास्थळी दाखल झाले. पोलिसांनी परिस्थितीवर नियंत्रण मिळवले आणि जखमींना तातडीने सामुदायिक आरोग्य केंद्रात (CHC) उपचारासाठी पाठवले. रात्रभर गावात तणावाचे वातावरण होते. दुसऱ्या दिवशी सकाळी गावातील प्रतिष्ठित नागरिक आणि माजी सरपंचांनी पुढाकार घेऊन दोन्ही पक्षांमध्ये मध्यस्थी केली. त्यानंतर लग्नाचे उर्वरित विधी पूर्ण करण्यात आले.