अहमदाबाद विमान अपघातासंदर्भात सध्या संपूर्ण देशभरात विविध प्रकारचे तर्क लावले जात आहेत. यातच आता, हे विमान का आणि कसे कोसळले? यासंदर्भातही तपास सुरू करण्यात आला आहे. योग गुरू बाबा रामदेव यांनी कटकारस्थानाची शक्यताही वर्तवली असून, दुश्मनी काढण्यासाठी तुर्कीमध्ये तर हे कट कारस्थान रचले गेले नाही ना? या दिशेनेही तपास करण्याची मागणी केली आहे. दरम्यान, नुकतेच भारताने पाकिस्तान विरोधात केलेल्या ऑपरेशन सिंदूरनंतर, भारत-तुर्की संबंध बिघडले आहेत. तुर्की सध्या पाकिस्तानचा खास मित्र बनला आहे.
बाबा रामदेव यांनी शनिवारी दिल्ली येथे एका कार्यक्रमात एएनआयसोबत बोलताना यासंदर्भात भाष्य केले. ते म्हणाले, "मला अशी माहिती मिळाली आहे की, तुर्कीची एक एजन्सी मेंटनेन्सचे काम करते. एव्हिएशन सेक्टरवर भारताला आणखी काटेकोरपणे लक्ष द्यावे लागेल. या माध्यमाने तुर्कीने दुश्मनी तर काढली नसेल? कारण तेथील एजन्सी सर्व्हिस मेंटन्सचे काम करते. तिने तर कट रचला नसेल?' या दृष्टीनेही या अपघाताचा विचार व्हायला हवा.
त्या एजन्सीचा काँट्रॅक्ट दोन महिन्यांपूर्वीच संपवण्यात आला होता, असे बोलले असता, बाबा रामदेव म्हणाले, यामुळेच भारताने अशा संवेदनशील गोष्टीत परदेशी लोकांचा हस्तक्षेप 100 टक्के संपुष्टात आणायला हवा. जवळपास 265 जणांचा जीव घेणाऱ्या या विमान अपघाताचा तपास, विमान अपघात तपास ब्युरो, डीजीसीए, अहमदाबाद गुन्हे शाखा आणि स्थानिक पोलिसांसह इतर एजन्सी तपास करणार आहेत. सूत्रांनी दिलेल्या माहितीनुसार, राष्ट्रीय तपास संस्थेच्या (एनआयए) अधिकाऱ्यांनी शुक्रवारी मेघाणीनगर येथील अपघातस्थळाला भेट दिली होती.
ही दुर्घटना, एअर इंडियाचे लंडनला निघालेले AI-171 विमान अहमदाबादहून उड्डाण केल्यानंतर काही काही सेकंदांतच एका वैद्यकीय महाविद्यालयाच्या वसतिगृहाला धडकले. या विमानात एकूण २४२ लोक बसलेले होते. यांपैकी २४१ जणांचा मृत्यू झाला आहे. तर रमेश विश्वशकुमार हा एकमेव प्रवासी वाचला आहे. तो आपत्कालीन दरवाजाजवळील सीट क्रमांक ११A वर बसला होता आणि वेळ असतानाच विमानातून उडी मारण्यात यशस्वी झाला.