अवैध सावकाराने शेतकर्‍यांच्या जमिनी हडपल्या अंजली दमानिया : खडसेंचा वरदहस्त, लिमोझीन कार जप्त करण्याची मागणी

जळगाव : सावदा ता.रावेर येथील भाजपाचा माजी नगरसेवक असलेल्या नंदकुमार पाटील व त्याचा बंधू सुधाकर पाटील हे अवैध सावकारी करतात. त्यांनी मारहाण, धमक्या आणि महसूलमंत्री एकनाथराव खडसे यांच्या नावाचा धाक दाखवून शेतकर्‍यांची १०८ हेक्टर जमीन हडपली. त्याच्याविरुद्ध तक्रारी केल्या तर पोलीस आणि सहायक निबंधक, उपनिबंधक, प्रशासन त्या बेदखल करतात. काम करू तर जीवन जगता येईल, अशी अवस्था या शेतकर्‍यांची झाली आहे. त्यांची लहान मुले हलाखीचे जीवन जगत आहेत. हाणामारी, दमदाटीमुळे एका शेतकर्‍याने विहिरीत उडी घेऊन आत्महत्या केली. तर एका शेतकर्‍याच्या मुलाचा गळा चिरण्याचा प्रयत्नही झाला. महसूलमंत्र्यांच्या मतदारसंघात, जिल्‘ात हे जंगलराज आहे, असा आरोप सामाजिक कार्यकर्ती अंजली दामानिया यांनी गुरुवारी जळगावात पत्रकारांशी बोलताना केला.

दमानिया बुधवारी दुपारी जळगाव शहरात दाखल झाल्या. तापी महामंडळाकडून काही प्रकल्पांची माहिती त्यांनी घेतली. गुरुवारी त्यांनी सकाळी उपप्रादेशिक परिवहन अधिकारी (आरटीओ) यांची भेट घेऊन महसूलमंत्री खडसे यांच्या जावयाची लिमोझीन कार जप्त का केली जात नाही, असा जाब त्यांना विचारला. आरटीओ यांनी आपल्याकडे लेखी तक्रार नसल्याचे कारण दिले असता दमानिया यांनी लागलीच दोन पानी तक्रार लिहून दिली. त्यात त्यांनी खडसे यांच्या जावयाची लिमोझीन कार ४८ तासात तपासणीसाठी बोलवा, याबाबत कायदेशीर कारवाई करा, अशी मागणी केली. तसेच जिल्‘ात एमएच १९, १९१९ या क्रमांकाच्या किती चारचाकी आहेत, त्यांचे मालक कोण आदी माहितीही आरटीओ यांच्याकडे मागितली, पण आरटीओ यांनी ही माहिती कामाचा दबाव अधिक असल्याने एक दिवसात किंवा लागलीच देता येणार नाही. लिमोझीन कारची तपासणी ४८ तासात करू, गरज भासली तर या कारचे मालक असलेले खडसे यांचे जावई डॉ.प्रांजल खेवलकर यांनाही आरटीओ कार्यालयात बोलावू, असे स्पष्टीकरण दिले.

दमानिया यांनी दुपारी लघु पाटबंधारे विभागात जाऊन पद्मालय २ प्रकल्पाबाबतची माहिती घेतली. ती माहिती देण्यास टाळाटाळ होत असल्याचे लक्षात आल्यानंतर दमानिया या संबंधितांवर चिडल्या. सुमारे दीड तास त्यांनी लघु पाटबंधारे विभागात प्रकल्पाच्या फायलींद्वारे माहिती घेतली. नंतर दमानिया यांनी शेतकर्‍यांना सावकाराच्या विळख्यातून मुक्त करण्यासंबंधी जिल्हाधिकारी यांच्याकडे अनेक मुद्दे मांडले. त्यांच्यासोबत सावकारग्रस्त १८ शेतकरीही होते. नंतर त्या ४ वाजेच्या सुमारास जळगाव येथून मुक्ताईनगरकडे रवाना झाल्या.