जयपूर, दि. 5 - जयपूर आंतरराष्ट्रीय विमानतळाबाहेर एका एअरहोस्टेसने वादावादीनंतर वैमानिकाला थोबाडीत लगावली असल्याची घटना घडली आहे. रविवारी रात्री ही घटना घडली. एअरहोस्टेस गुडगावची राहणारी असून अर्पिता असं तिचं नाव आहे. वैमानिकाचीही ओळख पटली आहे. दोघांमधील वाद वाढल्यानंतर विमानतळावरील उपस्थित सुरक्षारक्षकांनी मध्यस्थी करत भांडण मिटवण्याचा प्रयत्न केला. मात्र ते अपयशी ठरले.
सुत्रांनी दिलेल्या माहितीनुसार, एअरहोस्टेस इतक्या रागात होती की तिने वैमानिकाचा फोन घेऊन चक्काचूर करुन टाकला. यानंतर तिथे उपस्थित सीआयएसएफ जवानांना मध्यस्थी करावी लागली. यावेळी विमानतळ अधिका-यांनी दोघांनाही ताब्यात घेतलं आहे. सांगानेर पोलीस स्थानकात घटनेची माहिती देण्यात आली आहे.
सांगानेर पोलीस ठाण्याचे अधिकारी शिवरतन गोदरा यांनी दिलेल्या माहितीनुसार, 'सुरक्षारक्षकांना अगोदर हे त्यांचं खासगी प्रकरण आहे असं वाटल्याने मध्यस्थी केली नाही. मात्र नंतर त्यांचं भांडण वाढलं आणि मारामारी करु लागले. भांडण वाढू लागल्याने लोकांची गर्दी जमा होऊ लागली. मिळालेल्या माहितीनुसार, वैमानिक काही वेळापुर्वीच तिथे पोहोचला होता. तर एअरहोस्टेस गुडगावहून आल होती. प्रकरणाचा तपास सुरु आहे'.
सध्या दोघांची चौकशी करत असून हा त्यांचा वैयक्तिक वाद असण्याची शक्यता आहे असं पोलिसांनी सांगितलं आहे.
एअरहोस्टेसला बळजबरीने कॉकपिटमध्ये बसवणा-या पायलटला स्पाइसजेटने केले निलंबित
आंतरराष्ट्रीय उड्डाणादरम्यान एका एअरहोस्टेसला आपल्यासोबत कॉकपिटमध्ये जबरदस्तीने बसवणा-या पायलटला स्पाइसजेटने निलंबित केले होते. गतवर्षी ही घटना घडली होती. या आरोपी पायलटने केवळ त्या एअरहोस्टेसला जबरदस्तीने कॉकपिटमधील आपल्या सीटवरच बसवले नाही तर आपल्या सहवैमानिकालाही कॉकपिटच्या बाहेर काढले होते. २८ फेब्रुवारी 2016 रोजी कोलकाता येथून बँकॉकला जाणा-या विमानात ही घटना घडली होती. याप्रकरणी चौकशी सुरू होती, अखेर दोन महिन्यांनी स्पाइसजेटने त्या वैमानिकाला निलंबित केले होते.
कोणत्याही अनधिकृत व्यक्तीला कॉकपीटमध्ये पायलटच्या जागेवर बसवणे हे नियमांचे गंभीर उल्लंघन मानले जाते. तसेच विमानात एअर होस्टेसचे केले जाणारे शारीरिक शोषण हाही एक गंभीर गुन्हा आहे. दरम्यान या आरोपी पायलटने त्याच दिवशी परत येताना रात्रीच्या वेळेस पुन्हा ही लज्जास्पद वर्तणूक केली होती.