लोकमत न्यूज नेटवर्कमुंबई: प्रवाशांच्या सुरक्षेला सर्वोच्च प्राधान्य आहे, अशी ग्वाही एअर इंडियाचे मुख्य कार्यकारी अधिकारी कॅम्पबेल विल्सन यांनी एअर इंडियाच्या महाराजा क्लबच्या सदस्यांना दिली. अहमदाबाद दुर्घटनेतील अपघाग्रस्त विमानात उड्डाणापूर्वी कोणताही बिघाड नव्हता, ते सुस्थितीत होते, असा दावा त्यांनी केला.
‘एआय १७१’ विमानाचे मुख्य वैमानिक कॅप्टन सुमित सभरवाल यांना १० हजार तासांपेक्षा अधिक तासांचा उड्डाणाचा अनुभव होता. फर्स्ट ऑफिसर क्लाइव्ह कुंदर यांना ३४०० तासांपेक्षा जास्त तासांचा अनुभव होता, असे विल्सन यांनी स्पष्ट केले. या विमानाचे उजव्या बाजूचे इंजिन मार्चमध्ये व डाव्या बाजूचे इंजिन एप्रिलमध्ये तपासले होते. पुढील तपासणी डिसेंबर २०२५ मध्ये होणार होती, असे त्यांनी सांगितले.
आंतरराष्ट्रीय उड्डाणात १५ टक्के कपातसुरक्षा तपासणीच्या पार्श्वभूमीवर एअर इंडियाने दि. २० जून ते जुलै महिन्याच्या मध्यापर्यंत आंतरराष्ट्रीय विमानांच्या उड्डाणात १५ टक्के कपात केली आहे. प्रवाशांनी तिकीट रद्द केल्यास त्यांना पूर्ण परतावा दिला जाईल व दुसरे तिकीट काढायचे असल्यास त्यांना अतिरिक्त शुल्क आकारले जाणार नाही, असे त्यांनी स्पष्ट केले.
केबिन क्रू दीपक पाठक यांची ओळख पटलीविमान अपघातात मृत्युमुखी पडलेले केबिन क्रू दीपक पाठक यांच्या मृतदेहाची ओळख पटली आहे. त्यांच्या पार्थिवावर शनिवारी दुपारी बदलापुरात अंत्यसंस्कार करण्यात येणार आहेत. दीपक यांच्या मृतदेहाची ओळख पटवण्यासाठी बराच कालावधी लागला. डीएनए चाचणीनंतर शुक्रवारी मृतदेहाची ओळख पटली. मृतदेह बदलापूरला आणण्यात येणार आहे.
सहवैमानिक क्लाइव कुंदर यांच्या पार्थिवावर अंत्यसंस्कारअहमदाबाद येथे १२ जून रोजी झालेल्या विमान अपघातात मृत्युमुखी पडलेल्या सहवैमानिक क्लाइव कुंदर यांच्या पार्थिवावर मुंबईतील शिवडीत अंत्यसंस्कार करण्यात आले. कुंदर हे एअर इंडियाच्या एआय १७१ या अहमदाबाद ते लंडन विमानाचे सहवैमानिक होते. कुंदर यांचे पार्थिव गुरुवारी मुंबईतील गोरेगाव पश्चिम येथील त्यांच्या निवासस्थानी आणण्यात आले. तिथे अंतिम दर्शनासाठी त्यांचे पार्थिव ठेवण्यात आले होते. कुंदर यांना अखेरचा निरोप देण्यासाठी त्यांचे मित्र, नातेवाइक आणि परिसरातील नागरिक मोठ्या संख्येने त्यांच्या निवासस्थानी जमले होते. नंतर शिवडी येथील ख्रिश्चन स्मशानभूमीत त्यांच्यावर शोकाकूल वातावरणात अंत्यसंस्कार करण्यात आले. उपस्थितांनी त्यांच्या निधनाबद्दल शोक व्यक्त करत त्यांना श्रद्धांजली अर्पण केली. कुंदर यांच्या पश्चात आई-वडील व लहान बहीण आहे.