एअर इंडियाच्या विमान अपघातानंतर सर्वच विमान सेवा पुरविणाऱ्या कंपन्या हाय अलर्टवर आहेत. डीजीसीएने एअर इंडियाची ती वादग्रस्त विमाने तपासली आहेत. या विमानांमध्ये अनेक त्रुटी असल्या तरी त्यांच्यात गंभीर समस्या आढळलेली नाहीय. या विमानअपघाताला आठवडा उलटत नाही तोच गो इंडिगोच्या विमानाने मेडे अलर्ट पाठविल्याने खळबळ उडाली होती.
गुरुवारी रात्री गुवाहाटीहून चेन्नईला जाणारे विमान 6E 6764 च्या पायलटने चेन्नई विमानतळावर उतरता न आल्याने बंगळुरुच्या विमानतळाला मेडेचा संदेश पाठविला. चेन्नई विमानतळावर ट्रॅफिक जास्त असल्याने या विमानाला बराचवेळ हवेतच घिरट्या घालाव्या लागल्या होत्या. यामुळे पुरेसे इंधन असूनही हे विमान उतरू शकले नव्हते. बराच वेळ घिरट्या घालाव्या लागल्याने इंधन कमी झाले होते. यामुळे पायलटने बंगळुरू विमानतळाला इंधन संपत आल्याचा संदेश पाठविला आणि धावपळ सुरु झाली.
इंधन संपत आलेले असतानाही चेन्नई विमानतळाने गो इंडिगोच्या विमानाला उतरण्याची परवानगी दिली नाही. अखेरीस या विमानाच्या पायलटला तेवढ्याच इंधनाच्या जिवावर बंगळुरुला पाठविण्यात आले. या विमानात प्रवासी देखील होते. तरीही चेन्नईला हे विमान न उतरू देता बंगळुरुला पाठविण्याची जोखीम घेण्यात आली. रात्री सव्वा आठ वाजता हे विमान सुरक्षितरित्या बंगळुरूला उतरले. परंतू, इंधन कमी असताना देखील चेन्नई विमानतळावर का उतरू दिले नाही, असा प्रश्न आता उपस्थित होत आहे.
बंगळुरू विमानतळावर मेडे संदेश येताच त्या विमानाला प्राथमिकतेने उतरविण्यात आले. हेच चेन्नई विमानतळ करू शकला असता. बंगळुरूमध्ये हे विमान आल्यावर प्रवाशांना उतरविम्यात आले, विमानात इंधन भरण्यात आले त्यानंतर जवळपास दोन तासांनी पुन्हा प्रवाशांना घेऊन हे विमान चेन्नईला रवाना झाले. डीजीसीएला या प्रकाराची माहिती देण्यात आली आहे.